TolishMedia informasiyə agentəti muxbir Boku şəhəriku xəbə doedə ki, 10 ruji mıddətədə mıxolifətə Ozobiconi Milliə Cəbhə Partiya təğribən 40 gılə fəol həbs kardə bıə.

Bə pevılo bıə məlumoton əsosi, bə 14 gılə mıxolifətəvonon mınosibətədə cinoyətə ittihomon bə nav doə bən, 12 gılə fəolən bə 30 sutkəninə zindonə cəzo məhkum kardə bən. Əmandaniyon ya ozod kardə bən, yaən detobə ısət polisi şobəonədə mandedən iyən çəvon status mıəyyən ni.

Bə yod dəğandəmon ki, iyulə mangi 14-ədə şangovəsəy Boku iyən çand gılə co şəhəronədə həzo-həzo odəmon de səfərbərəti iyən «ermənion dasto Ğərəboği ozod karde” tələbon mitingon dəvuniəşonbe.

Im etirozinə aksiyə vey rə bə Boku rejimi zidd anti-hukməti mitingi pegardə be. Etiroz kardəkəson çı Boku diktator Əliyevi istefo tələb kardedə bin iyən de zuy bə Milliə Məclisi dılə dəşə bin.

Ğıvvə koəvonon dastələvon, ovi şırnə iyən çəşon arsin kardə ğaziku istifodə kardəşonbe iyən xəyli etiroz kardəkə mıxolifətəvonon həbs kardəşonbe.