Cıvonə fəol “Tubzona”-dəy
TolishMedia informasiyə agentəti muxbir Boku şəhəriku xəbə doedə ki, Ozobiconi Milliə Cəbhə Partiya uzv Məmməd İbrahimi zoə Mehdi İbrahimov dəğandə bıə bə Penitensiarə xıdməti bo silinə noxəşinon xısusiə mıəssisə ki, de “Tubzona” nomi məşhure.
Bə pevılo bıə məlumoton əsosi, cıvonə fəol de Cinoyətə Məcəlləy 139.1.1 (karantini rejimi darışte) maddə ittihom kardə bedə. Bə çəy mınosibətədə de məhkəmə ğərori dəstgirəti tədbir vıjniə bıə.
İstintoğ isror kardedə ki, Mehdi İbrahimov karantini rejimi darışteədə ittihom kardə bedə, əmma çəy pıə xəbə doedə ki, ıştə zoə de iyulə mangi 15-nə ruji etirozinə aksiyə əloğədor həbs kardə bıə.
Bə yod dəğandəmon ki, bə huğuğə mıdofiəkoron məlumoton əsosi, de iyuli 15-y etirozinə aksiyə angıl 40 nəfər həbs kardə bən iyən əksəriyət çı OMCP uzvonin.
