Xıdovandə-Aləmi insoni ofəyə rujiku əv ıştə navomə de maraği umutedə, bəy dasto omə səviyyədə hozzo bedə. Navomədə bə insoni sə oməyon, çəy vıjnə peşə, çəy cəmiyyətədə mövqe sıftəku umütə, bəy proqnoz doe, bəy hozzo be çi ha insoni dıli piyəye. Bə insoni tale mıxtəlifə alimon, filosofon mıxtəlifə formədə nez bedən co-co formonədə umutedən. Çəvono i hissə insoni tale çəy dastədə nıbe, sıftəku nıvıştəbe ğəbul kardedən. Yəne insoni tale çəy dastədə ni, əv bəştə sə oməyon səbəbko, cavabdo ni. Dıminə poə ısəbo insoni tale çəy dastədə be, bəy anqıl be votedən. Bə dıminə nəzəriyə qoroş ha inson bəştə navomə cavobdoye, çəy ictimai, maddi mövqe çəy ıştən dastədəye.

Əncəx qıləy elmi-fəlsəfi sahə heste ki, bəy pentonədə ğeyd kardə hisson dıynəni, yolə marağ nuşo doydən. Hətta dini fəaliyyətədə bə insononən bı sahə yolə marağ nuşo doydən, əy nığılo umutedən, təhlil kardedən. Kome ım sahə ki, bəy jıqo marağ heste? Im sahə astroloqiyaye. Astroloqiya yunanə zıvono peqordınədə “staro”-“astovə”, “loqos”-“elm”, “fikir”, “səbəb” məno doydə. Yəne astovon həxədə elm, fikir. Astroloqiya tarix ve ğədime. Kali alimon çəy tarıxi bə Mustye devri aid kardedən ki, ımən bə 40-100 həzo sor çəməku bə navi aide. Qıləy çi sərost vote bəbe ki, çəmə eraku bə nav 3-minə həzo sori sıftənə əsronədə Mesopatamiyadə astroloqiya umutə bə, və bı sahədə tədğiğaton bardə bən. Astroloqon əsasə vəzifə osmoni cismon hərəkəti bə insonon jimoni təsiri umuteye. Dıro astroloqon iqlə çı insonon ne, hətta devlətonən navomə votedən.

Qoroskop. Isətnə devrədə çı astroloqiya ən ve inkişaf kardə sahonədə qıləy qoroskope. Qoroskop insonon kom sor, manq, rujədə be bə çəvon tale, xarakteri təsiron umutedə. Jıqo ki, ha sor donzə manqe və donzə burciku iborəte (Ğoç, əğrəb, moy i.c). Həmçinin soron devrəən donzə soriku iborəte (Asp, sıpə, suk, morə i.c).

Astroloqiya iyən fərhənq (mədəniyyət). Astroloqiya bə fərhənqi inkişafi yolə təsıriş bə və ısətən heste. Çəy təsiri arxitekturədə, musiqiyədə, incəsənətədə, ədəbiyyatədə nıvinde mumkun ni. Şekspir, Dante, Skott iyən co məhşuron əsəron həmonə devri astroloqiya konsepsiyon nuşo doydən.

Astroloqiya iyən elm. Muasirə elm astroloqiya bənə “duyə təlimi” ğəbul kardedə. Əncəx ımiyən ğeyd kardedən ki, astroloqiya bə co elmi sahon inkişafi yolə tovış doə. Jıqo elmi sahonədə riyaziyyati, metroloqiya, astroloqiya misal kəşe bəbe.

Astroloqiya iyən İslam. Məlume ki, islamədə caduqarəti, dıvo, fal iyən co jıqo əməlon yolə qıno hesob bedən. Astroloqiyayən bı siyahi aide. Çumçuko insoni tale Xıdo dastədəye və əy sıftənəku təyin karde mumkun.

Mılxəs. Pentonədə handəyonku bə joqo qıləy nəticə ome bəznemon ki, i mənoynə ni. Əncəx cəmiyyəti bı sahə marağ şe-şe ve bedə. Məhşurə astroloqon veyin, çəvono ən məhşuri Nastradamus bə ki, I, II Dınyo muharibon, Hitleri bə hakimiyyət ome i.c. hadison sıftəku votəşbe.

Aqşin Dadaşzadə