TolishMedia informasiyə agentəti muxbir Boku şəhəriku xəbə doedə ki, çımiku çand ruj bə nav bə tolışə bloger Elvin İsayevi mınosibətədə cinoyəti koy təyğat bə orəx rəsə. Elvin İsayev dovləti zidd ojə şuoron vang kardeədə ittihom kardə bedə.

Bə pevılo bıə məlumoton əsosi, bə Elvin İsayevi mınosibətədə bıə materialon bə Boku gonə cinoyəton məhkəm vığandə bıən. Məhkəmə proses de hakim Əfgan Hacıyevi sədrəti dəvoniə bəbe. Nezə vəomədə çı məhkəmə prosesi ruj təyin kardə bəbe.

Bə yod dəğandəmon ki, Elvin İsayev de Ozobicon Respublikəy Cinoyəti Məcəlləy 281.2-nə (de zuy hukməti gətım karde iyən dovləti zidd ojə şuoron vang karde) maddə ittihom kardə bedə. Əv Ukraynadə həbs kardə bıəbe iyən 2019-nə sori dekabri 12-də bo Ozobiconi təhvil doə bıəbe.