3 -minə baxş

Əziz handəkəson! Şıməku dəvət kardm ki çand ləhzə ıştə İsa mamu oxnə nıvıştəyon çı  “İsrailı rejimı de İron İslam Rispublikə həmmarzbıe” barədə, bahandən.

Iron de Boku rejim iyən Turkiyə dim bə dimbıeədə əvoni xususən Boku hukomətı ve ruk nişo doşe iyən çəy vədə tamış jəy, ın hərəkət vey yolə pırablemoni təşkilbıe səbəb bəy. Yodıku beməkəmon ki İlham Əliyev ki ıştəni de gıləy Şiə ulkə pırezidentı unvani zındə de Səodi Ərəbıstoni iyən de İsrailı rejımı vey iğtisadi mıbodiləonış heste iyən Ğərəbağı cangədəən çı İronı zidd ulkəonku bə Boku kıməgəti kardeədə ve bəhr bardışe. Jəğo ki ısətən çı Ğərəbağı kali məntəğəon ətrofdə ın ulkəon ğıvvon hozı bedən. Əlbəttə ki İronı İslamiyə Rispoblikə ıştə təsiratı jiədə ğəror doe əçəvon əsos məğsəde.

Boku iyən Ankara çı İron iyən İsrailı hamsuə karde pılanı idomədə Siriyavıjə teroriston ovoştıniye bə Ğərəbağı məntəğə de Ankara nizamiyə ğıvvon vəsiləən təşkil kardışone. Ki əlbəttə Urusyə “Sputnik” agentən Ğərəbağədə Siriyavıjə mıjdıron fəaliyətıku xəbə doəşbe. In məsələ ıştənsə çı İronı siyasi iyən nizami rəftoron mıəyən iyən ruşin kardeyo lozım bin.

Turkiyə iyən Boku çı İronı zidd fəaliyətondə, İronı kali siyasi iyən nizami lideron ve sıxanoni çı Ğərəbağı cangı holədə ilon kardəşonbe iyən kali nizamiyə manevroniən ıştə sərhədondə təşkil kardışone ki ısət lozıme bə yod biyəmon kali həmonə votə sıxanon iyən həmonə fəaliyəton:

1. İron İslam Respublikə nizami ğıvvon sərnatığ ilon kardəşbe ki əmə çəmə marzon kənoədə teroriston gırdəbıe tob vardənimon. Sərdar Şekarçi İroni İslamiyə Respublikə nizamiyə ğıvvon sərnatığ ijən votəşbe ki “səyhonist rejim“ı cəsusəti mərkəzonən əcumlədə co muhimmə məsələonin ki əmə de hiç unvani icozə doydənimon çəmə marzon kənoədə iyən Ğərəbağı cangiyə məntəğədə təşkil bıbon. Əgəm jığo nıbo iyən “Siriya teroristi“yə goropon iyən “səyhonist rejim“ı cəsusəti mərkəzon çəmə marzondə fəaliyət bıkən, İron de şiddəti dəvon rəftor bəkəy.
In sıxan əlbəttə ki İronı ve məsolon tərəfiku tikror be əmmo de ın sıxani əsos rəftor nıkardışone.

2. Boku de Ğərəbağı şərğ iyən şimal məntəğədə hıcum karde bə nəticə rəse nıznişe iyən ıştə siyasəti jığo ğərorış do ki ıştəni bə İronı marzi nez bıkən iyən lap İronı sərhədon kənoədə çı Ərəsı ru kənoədəbıə vıronku bə Xoda Afərinı ovə dambə tərəf peşoən bə İron iyən Ermənistanı marzi tərəf bışon.
Iyoən İron ıştəku de ğudrətmandəti fəaliyət nişo nıdoşe iyən Tamış jə.

3. Ğərəbağı cangı vəziyətdə kali tamşoəkonən İronı marzı kənoədə qırdə bin iyən ın canqı vəziyətı nezədə diyə kardəbin. Quya ın pırogram çı panturkiston qıləy məğsədonku be ki de kali ıştə cəsuson vəsilə ki canqı tamşoəkon dılədə hozı bedəbin bə Ozərboyconı nizami ğıvvon xəbə rosnedəbin, ki soşiyəl mediadən kali təsviron iyən filımon nişo doydəbin ki i qorop tırkon çı İronı marzı kənoədə qırdə bən iyən bə canqı tamşo kardedən. əçəvon arədə hestbin kəsoni ki de nizamiyə kameraon canqı vəziyəti tamşo kardedəbin iyən deştə dastə telefoniən sıxan karde holədəbin, ki quyə canqı vəziyəti bə Ozərboyconı nizami qoropon raport doydəbin.

Boku hukumət, Ermənistan iyən İronı sərhədondə kali canqı tamşoəkon çı Boku panturkə hukomətı cəsusonku bin ki lozım be İronən dəvon de siyasi iyən insofi rəftor bıkə, əmmo vindımone ki İronədə məsolon jığo nıkardışone. Gasbo çəy səbəbən Panturkə ğıvvon nıfuz iyən zumandəti goroş be ki İronı hakimiyətdə mudaxiləışon heste.
Əlbəttə ki İronı nizami iyən əmniyəti ğıvvonən ın canqı tamşoəkon tojniyedənıbin.

4. İron İslam Respublikə ıştə nizamiyə ğıvvon hejo bəştə ulkə şimal-ğərb məntəğə vığandışe. Jəğo ki çı Ğəzvin məntəğə 116-minə batalionən iyən Mərağə, Mazəndəran iyən kali nizami baxşon bəştə ulkə şimal-ğərb sərhədon tərəf ovoştınyəbin.

Əmmo guya ımən əncəx gıləy nizamiyə manevr be, boçi ki Boku iyən Turkiyə deştə dustə ulkəoni ki de Ğərəbağı cang kardeədə dəvon kıməgəti kardəbin, bə İronı ın siyasi iyən nizami hərəkəton diğğətışon nıdoe.

5. Boku iyən Ankara de Ğərəbağı məntəğə bə dast dəvoniye məğsədi bəştə roy idoməışondo, peşoən İron iyən Ermənistanı arədə marzon əmniyətı zəyif kardeədə hərəkət kardışone. Bı holədə İron əncəx de ın sıxani ki “əmə məntəğədə jeopolotik xəritə dəgiş karde ğəbul kardənimon“ ıştə siyasi iyən nizami fəaliyəton oroxnişe.

In həmmə sıxanon, fəaliyəton iyən manevron nəticədə, ımruj vindəmon ki Boku iyən Ankara çı İronı ulkə iyən Israilı arədə hamsuəti əloğə təşkil kardeədə bə nəticə rəsedən. In tojə hamsuəti iyən həmmarzbıe bə İronı ulkəyo ve bevəc təsiratonış bəbe ki əgəm de Tehranı ojnən tamjıe həmro bıbo, omə rujondə bəpe İronı İslamiyə Rispoblikə Şimal-Ğərb məntəğədə tojə təşkilbıə kırizisoni şohid bıbəmon.

İsa Tolış