1-minə baxş

Təhliləkon məntəğədəbıə ən muhimmə nizamiyə hərəkət yəne Ğərəbağı cangı analiz kardedən. Turkiyə ləşgərı vəzifə ki əlbəttə cangədə hozı bin iyən çəy dırononən bı cangədə istifodə bedəbin analiz bedən.

Boku hokumətı bə Ğərəbağ hıcom barde vaxtədə çand gılə Azəri iyən Urusi jornalon çı Ozərboycon Respublikə mudafiə vəzirı iminə mıovin -general Nəcməddin Sediğovı koyku bekarde barədə xəbəışon doe. Kali xəbondəən ın generalı gəte de ın iddıo ki əv de Urusiyə ləşgərı əmniyət təşkilati əloğəış hestbe unvan bəy.

Bə vaxtədə ilon be ki ın general de “Ozərboycon Respublikə nizami ğıvvon rəhbərəti de Turkiyə vəsilə“ ziddiyətış hestbe. Boku hokumətı mıdofiə vəzorət ın generalı gəte xəbə rəd kardışe. Əmmo bə vaxtiku to bə ısət ın şəxsıku hiç vırəydə xəbəy ni. əlbəttə ki əçəy məcozi səhfəən birdən Boku nizamiyə baxşı rəsmiyə saytıku gin be.

Bı səbəb ki general Sedığov Dagistanı Dərbənd məntəğə ləzgionku be iyən Azəri zıvonı zıniyeədəən zumand nıbe. In həğiğətən heste ki əçəy mamu zuə Ermənistanı Giumriədəbıə Urusiyə nizamiyə mərkəzdə fəaliyətış hestbe. In sıxanon nişo doydən ki Boku hokumətı nizami təşkilət iyən ləşgərdə ve muhimmə pırablemon iyən fasiləoni hestin ki de co pırablemon iyən daxiliyə dışmenətion həmro ruj bə ruj ve oj bən.

Turkiyə nizami ğıvvon çand soron çimiku bə na çı Boku nizami təşkilatdə ve nıfuz hestışonbe iyən əçəvon ğudrətmand karde pidəşonbe, əmmo de Ğərəbağı cangı təşkilbıe əçəvon vıronən Bokuədə zumand bin. Turkiyə nizami ğıvvon iyən generalon nıfuz çı Boku nizamiyə təşkilatdə məsələy be ki Boku nizamion əvı tob varde nıznişone.

Boku hokumətı nizami lideron əcumlədə kəsoni hestin ki çı Səvet hokumətı dıvrandə nizami darson umotəşone iyən ısət Bokuədə ko kardedən. Həmonə nizamion de Ermənistan iyən Urusiyə nizamionən əloğədəbin. Jığo be ki Boku çı Turkiyəvıjə ofiseron iyən generalon çı ın Səvet hokumətı dıvrandə dars umotəkəson vırədə noe pidəşe.

I kəs çı Ozərboycon Respublikə mıdofiə vəzorətı liderı nezədəbıə kəsonku de gıləy rujnomə votdımon kardeədə votəşbe ki i gorop Turkiyəvıjə nizamion de Turkiyə zəmini baxşı nizamiyə ğıvvon əməliyot təşkilatı sədr Baxtiyar Ersay rəhbərəti Ğərəbağı cangı pırogramon təşkil kardeədə iştirok kardəbe.

General Sediğovı koyku bekardeku bə peşt Baxtiyar Ersay ıştənsə çı Ğərəbağı cangı pırogramon rəhbərəti kardışe. Turkiyə zəmini nizamiyə ğıvvon 3-minə ləşgərı lider Şeref Ongayən Ğərəbağı cangədə iştirok kardəşbe. Şeref Ongay de çand gılə co Turkiyəvıjə generalon həmro Tırki-Azəri nomədə nizamiyə əməliyotı təşkil karde pırogrami əncom doe pidəşonbe.

Bokuədə gıləy xəbəiyə mənbəən ilon kardışe ki Baxtiyar Ersay iyən Şeref Ongay Ğərəbağı cangədə hozı bin iyən Baxtiyar Ersay Ğərəbağı cangədə həmmə əməliyoton sədr be.

Idoməış heste… .