2_minə baxş

Pırogrami nakonə baxşədə votımone ki Bokuədə gıləy xəbəiyə mənbə ilon kardəşe ki Baxtiyar Ersay iyən Şeref Ongay Ğərəbağı cangədə hozı bin iyən Baxtiyar Ersay Ğərəbağı cangədə həmmə əməliyoton sədr be. General Baxtiyar Ersay şəxsiyətiku ve sıxan bə miyon omedəni. Tobə ısət Urusiyə jornalondəən çəy nom ğeyd bə nin. Əlbəttə Englisiyə jornalon iyən xəbəiyə mənbəonku ve kam çəy nom ğeyd bəy. Əmmo çand gılə məğalədə çı Turkiyə mətbuatdə Ersay nomı vinde bəbe.

Hürriyət rujnomə ın generalı jimonı barədə 2016-minə sori Avgustə mangədə nıvıştəşe. 2003-minə sorədə Baxtiyar Ersay de gıləy əmniyət ofiserı unvani çı Rəcəb Təyyeb Ərdoğanı zidd nizamiyə hərəkətdə hozı be. In hərbi dəgardemonı barədə məlumat əncəx 2010-minə sorədə ruşin be. Nəticədə Ersay gətışone iyən əvı bə 16 sor zindon məhkum kardışone, Əmmo əçəy hukmı unvan kardeku bə peşt rə-rə ozod be.

De kali raporton əsos Baxtiyar Ersay de Turkiyə hukomətı gıləy siyasi səvdı əncomış do. Peşo əvı bə Turkiyə Kırdə cəbhəon vığandışone ki Turkiyə Şimal məntəğədə de PKK yəne Kırdıstonı koəkon partiyə zidd əməliyoton əncom doşe. Əv partizanon zidd cangondəən gıləy zumandə general be. In generalı goropı barədə bəbe vote ki əvon de həmmə xəlğon bevəc iyən çətin rəftor kardəbin.

Baxtiyar Ersay gorop Liviyədə əməliyotondəən iştirak kardışone. Liviyədə Moəmmər Ğəzzafi rejimı məhv kardeku bə peşt general Ersay ın Ulkədə Tırkə nizamiyə ğıvvon bə Turkiyə ovoştoniye məsul be. 2019-minə sori Avgustə mangədə Haber jornali holding ilon kardışe ki Turkiyə nizami ali şura sərləşgər dərəcə bə general Baxtiyar Ersay doəşe.

İsa Tolış