Vəlişah Əliyev Mirəli zoə moəo bıə 10 mart 1939-nə sorədə Lankoni rayoni Şağlase diədə. Sıftə handəşe Şağlase, peşo Sepadi myonə məktəbədə, ali təhsil səşe Azərboycon Politexnik İnstitutədə Boku şəhrədə, çəyo Lankonədə muhəndis-texnoloq ko kardəşe.

Dəvardə əsri 80-nə soronku jıqo mətbuatədə çap bıə çəy bə tırki, bə tolışi nıvıştə şeeron. 90-nə soron sıftəku Lankonədə təsis kardəşe “Ruşnə” ədəbi məclis. Məxsusi xıdmət bıəşe çı Məclisi cıvonə şairon perosneədə. Vəlişah mamu əbədən bəmande çəmə yodədə bənə Tolışə poeziya ofəyəmoni.

Vəlişah Əliyev 2020-nə sori Mayə mangi 13ədə bə xıdo rəhmət şe.

Karde

Dılım ıştı orzu boğ be, çı foydə,
Bə du beşe, de zəmini i karde.
Şoy-voy karde, çəy rizisə ğəm nışte,
Ovdonəyon bə loruni hu karde.

Çiç be oxo, hejo ıştı çəşdəbim,
Qırdo tı bim, bəşdı otəş vəşdəbim,
Iştı muəxol okardəbim, rışdəbim,
Hiç nıznıme tıni mıku ki karde.

Qəvonədə nəve bəmı doəbiş tı,
Bandon sə -az, pozi sıftə vabiş tı,
Həmməy vinde, çımı səpe voəbiş tı,
Hicroni voş ome, tınış ni karde.

De tı nəvə vıron bəçmı sə dəşe,
Nəvim vıjə-vıjə, ah kəşe-kəşe,
Iştı lınqə rizon bənim təşişe,
Deştə çəşə ason əvım si karde.

Çe Vəlişah ahu-nalə ki məse,
Har kəs ıştə eşği qoni dərəse,
Korpə eşğım deştı dasti perəse,
Əv cohil be, əmo mını pi karde.