Turkiyə nomədə rujnomə gıləy məğalədə nıvıştəşe ki İlham Əliyev çı Boku pırezident de Frans 24 kanalı votdımon kardeədə, ın parsı cəvobədə ki çand gılə dıronıyon heste votışe: ın məsələ sirrinə məsələy, əmmo kifayət əndozədə dıronımon heste. Xəlğ Respublikə partiyə idıo kardəy ki Boku hukumət de Ğərəbağı cang kardeədə, de dıronon vəsilə ğalib bəy iyən Turkiyə əncəx nizami kıməgətion bə Boku vığandəşe.

Əmmo həğiğət ıme ki Boku hokumət ve soron Tel-Əvivı dıronon hıryedəbe əmmo Boku dəvardə çand sorədə Turkiyə Baykar company dırononkuən hıryəşe. Tel-Əviv Elektıronikə cangı avjoron bə Boku həvate kənoədə, əçəy əsgəronən təlim doydəbe. Əmmo İlham Əliyev idıo kardəy ki Turkiyə dıronon Ğərəbağı cangədə ve muhimə vəzifəışon hestbe. Turkiyə ıştə dıronon bə Boku həvateku bə na, dı gılə əhəmiyətinə hərəkət Bokuədə təşkil kardışe.

De Turkiyə iyən Boku arədə nizamiyə həmkoətion ğərordodı əsos 1992-minə sorədə Boku ofiseron çı Turkiyə nizamiyə akademiyə mərkəzondə nizami ilmon umutedən. To bə lsət 7.225 kəs Boku ofiseron Turkiyə cangiyə akademiyə mərkəzonku ıştə darsı oroxniyəşone. Turkiyədə təlimbıə ofiseron ısət de Boku generalon unvani fəaliyət kardedən. Yəne cangı sərkomandəti ixtiyor əçəvon dastədəy. Isətən 342 kəs çı Boku ofiser tələbəon Turkiyədə bə nizamiyə təlimon umute məşğulin.

Bə tərəfdəən Turkiyə ıştə ofiseron çı Boku nizami ğıvvon təlimatı goroş bə ın ulkə vığandedə. Turkiyə kali akademiyə mərkəzonən Bokuədə təşkil kardəşe, ıme ki ımruj Boku nizamiyə ofiseron iddə bə Turkiyə vığande tikəy kam bedə. Əmmo Tel-Əvivı məğsəd bə Boku kıməgəti kardeyo çiçe? Həmmə siyasi koyəzonon zındən ki ın parsı cəvob dı gılə məsələy:

1) Tel-Əviv de Ermənistan iyən Ermənion diyasporəku veən xəşış omedə ni.
2) Əvon Ermənistan iyən İronı arədə dustəti goroş ve norozin. İsrail çı Nazcivan-Boku arədə koridorı təşkil bıeku rozin, bı səbəb ki ın məsələ ğəyri-mustəğim bəvonyoən gıləy muhimə xal bə hisob omedə.