Xəbə doşone ki, amunəvə Rəmkə bala əskərəti orıxnəşe, bə kə omə. Ve şo bim. Şınəym ki, bəşem Rəmkə bala pebəqətem, bəbardem bə olətə məğəzə, çi libos bıpiyoşe-pebəqəte. Peşı bəbardem əy bə restoran, si coni hard bədom bəy. 50-60 mənotən dəbənom bəçeəy cif. Çunki bəıştə həmroon votəşbe ki, ənə iyo 10-12 ruj bəmandem, bəşem bə Ərəse, ıştə mamuon palu. Ənə iyo bomıro nə ko heste, nə mərağ.

Rəmkə dəvardə sorinim əskərəti vaxtədə həm ıştə xıdmət bə sə jəşbe, həmən 44 rujnə Dıminə Ğərəboğ muharibədə iştirak kardəşbe. Bənə çeəy nezə ğohomi azən bo Rəmkə bala səhhəti ve norohət bim. Isə şuk bə Xıdo, səğçilə omə, ve şukur kardıme, bəçeəy didor tadi qətıme.

Tyok darşiyəbe, bitonə kəybəku beşim, çəlik ekuye-ekuye səbəro bim bədu hamsiyə amuzoə dudmoni. İtotən portmənotən peqətəmbe, ənə əyo tosə 200 mənoti pulən hestbe. Şınəym ki, Rəmkə bala çemı boəyo olət-libos hıriyey rozi nıbu, demı bə restoran omey nıpişey, hejo de “hışkə” , yəni de pul doy koon bə riyə bənom.

Oməym bə amuzoə pəleti rəsəym, dast ğandıme qədə bəleti bə okəm, ikərədə çemı quşəbınədə qıləy bərkə tifanqə sədo tıpəy. Quşonım eşe, səm qərm be, conım larzəy, ıştən bəıştə votıme:

-Əhəy, jəşone mı, oxorzəmone, — Dastım dəsuey bə andomi har vırə, bunum qullə bə çemı kon vırə qıniyə? Bənem, ney, har vırəm xəşe. Kəybə cır-cır oməy, sə rost kardıme, bənem amuvəyu beşe mande kəybəsə, votışe:

-Jəy zınəy? — Sıftə jıqo zınəyme ki, demışe, yəni demı qəp jəydə. Əmma ne, soy nığılədə parçini tyokə tərəfo amuzoə qerə sədo oməy:
-Ha kinə, çeəy conən səme.—Satijo bə vaştə purjini oqardə andomım ikərədə fıs kardışe, təyli be, nığılə nəfəs səme:– Şuk bə Xıdo, demışon koy ni, amuzoə qıləyən dızdə kıtı bə qullə jəşe…

Az hejo əyo hut bim, mandim bəleti qəvədə, mıddəti nə bə nav şim, nə bə dumo oqardim. “Xıdo, ım çi ruj be, az eqınim? Bəleti okəm, səlom bıdəm, bıvotım, çəşonon ruşin, Rəmkə bala əskərətiku omə, xəş omə? Amuzoə əvotni ki, bo çəşruşni doy vaxt pəydo kardə? Az çi hayədə, tı çi hayədə?!

Bə ğərol oməym ki, bə çəşruşni nışum. Çemı ənə iyo omey Xıdo məsləhət zınəş ni ki, ın çoçinə hadisə bə arə dəşə. Çəpə dastım ıştənbəsə dəşe bə pulə cif, portmənot qıniye bə çemı anqışton. Yəni ın pulonən xarc kardey lozim nıbe?!

27.07.2021 Allahverdi Bayrami. Mədo.