Xosə boliyon, xosə bıvon iyən hovon. Sıxani rosti Azərbaycanədə nıştə tolışon ve çok bəsə dəşedəm, əve ve vaxti bəçəvon kardə ve koon çəş dabastedəm. Mande həni orəxnə vaxtonədə əvon ov çe lokə peş kardedən.

Navədə əy bıvotom ki çe Şirəli Əlyar ( Ağayev Əliyar Şirəli zoə) “Bəbıri Nırrə” nomədə qılə kitob beşə. Sıxan ni kitobi beşe ve çokə koye, qirəm bə kitobədə ədəbi zıvoni normativon hiç nıbu 90% ıştə vırədənbu. Çe Əliyarə boli nıvıştə stili çoknəy zınedəm, ım odəmi vote bəbe çe Tolışə zıvoniku xəbəş ni. Hejo çı kitobi nomədə qıləy yolə xəto heste, əvən NIRƏ vırədə NIRRƏ sıxane. Tolışə zıvonədə vote bəbe şiddətinə diftonq ni ( dıqlə samit i vırədə) . Oxo har nıvıştə kitob bəpe bə zıvoni ovcbey ğolloğ bıkə. Imon ısətboy Rusiyakuş qətə bə Avropa həmə odəmon zibə bardedən ki, çiçe – çiçe qıləy həpəroyə kitobım nıvıştəme bo əçəy çapiro pul bıvğandənən. Im jıqo…….
ısətən boəmon çe koy kaşi kutisə.

De Tolışə baləliyon puli çapo beşə ım kitobi çe pantırkə əğıydədə bıə HƏP nomədə partiya ofisədə çe Tırkiyə pərçəmi jintono edaştedən. Ha diə bıkənən har çi iyo niyo bıə. Azərbaycani de tolışon deşmenəti kardə hukumət həni zınedəni əməni çoknəy çe Rusiya iyən İroni çəşo eğandon. Im koən de çəmə kali soyə tolşon kaliyən ıştə har çi bə dınyo moli havətə “tolışon” dasti kardedən. Bə Rusiya iyən bə dınyo qırd qılə kələntərə mərdumi – ruson xuq votə, bə farson bic votə İsfəndiyar Vahabzadə de yeraz Əli İnsanovi siprişəti bo tolışon ruj bəmedən?! Valla bımi marde lazime vote, kame.

Ve dıroz nıvıştem pidənime. Bəçəyro har çi qılə vaxtış heste. Çımı votəy əve ki, çiç kardon bıkənən, mande ıştə mərdumi bı deşmenə pantırkon məhavatənən. Pəşimon bəbeyon, həni bəvədə şımə dast bə hiç vırə ərəsıni. Qirəm kom Tolış ım koy çokə hol zınedəbu, bəvonən jıqo votedəm: Xok bəşmə sə bıbu ki, şımə de jıqo dəmərəsəti bəştə Tolış votedon!

Zabil Mədoj