İlham Əliyev ve ruşin ilon kardedə ki Ğərəbağı cangədə İsrailı dıronon hıryəmonbe iyən 2016-minə sori Aprelə mangədə ın dırononku bəhr bardəmone. Bəvaxtonədə ki Turkiyə sənəti-nizami gorop dıronon soxtedə nıbin.

Əv dəvardə sentiyabrə mangi 27-minə rujədəən çı Ermənistonı navədə cang karde vaxtədə Asunə mışti nomədə əməliyotiku gəpış je ki de Boku vəhdətinə ulkəon kıməgəti çı Ermənion zidd təşkil be.

Əliyev votdışe ki to bə Ğərəbaği 2-minə cangi vaxt ın dırononku istifodə karde jığo ki əmə bəvonku bəhr bardımone təcrubə bənıbe. Əv ijən əlovə kardedə ki əmə nez bə 10 sore ki dıronon hıriyedəmon. ın silahon İsrailı soxtə silahonin iyən əmə 2016-minə sori Aprelə mangi kıto mıddətə cangədə əvoni imtivon kardəmonbe. In be ki Ermənion tob varde nıznişone.

İlham Əliyev votdə ki əmə İsrailıku Sky Striker nomədə dıronon hıriyedəmon iyən ın məsələ bə heç kəsiyo pınhon iyən naməlum ni, həmmə kəs zındən ki əmə İsrailıku dırononi sedəmon ki dışmeni pəydo karde iyən cang karde gorə duz bən.

Boku respublikə pırezident İlham Əliyevı ın sıxanon bı vaxtədə unvan bedən ki ğərore dınyo Ozərboconıjon(Tırkon) konfıransiyə Ğərəbaəı Şoşi şəhərədə de Boku vəsilə təşkil bıbo. Əliyevı ın ruşinə meseci məğsəd ne bo Ermənistonıyo bəlkəm bo əçəy cənubiə ulkə yəne İronıe.

Əliyev pidəşe ki ıştə ğıvvətmandəti iyən səbarzəti bə İronı nişo bıdə iyən bıvotdo ki ıştə siyasi məğsədon rəseyo pırogramon təşkil karde bəzne.