MTNi Energetika inən Nəqliyyat Sahədə Əmniyyətə sər İdarə navkonə rəisi, general-mayor Akif Çovdarovi mysadirə bə əmlokon bə dumo oqordone band Boku Apelyasiya Məhkəmə ğərariku bə sər Prokuraturə bə Ali Məhkəmə kassasiya protestış vığandə. Bın barədə sər Prokuraturə mətbuat xıdməti məlumatış doə.

Akif Çovdarovi dəstqir kardə bə peş bəçe ıştəni inən xeyzoni məxsus 30 milyon mənotisə ziyod ğıymətədə əmloki səpe həbs noə be inən əçe həxədə hukm doədə əmlokon musadirə ğəror doə bəbe.

Akif Çovdarovi bə ozodəti vadoə təxminən sori nim bə peş – 2022-minə sori dekabrədə Boku Apelyasiya Məhkəmə navkonə MTN ğenerali xeyzoni əmlokon band şikatış təmin kardə, əvoni bə dumo oqordone ğərorış doə be.