Novruzəli Məmmədovıjon tuməbır karde, hiç məmləkəti sədo benışe. Hilal Məmmədovıjon bə zindon dənojone, hiç qılə məmləkət ıştə sədoj benıkarde. Fəxrəddin Abbasszodə çı Rusiyəku dızdijone vardıjonə bə Azərbaycan iyən zindonədə kıştıjone ijnən hiç qılə keşvəri sədo benışe. İsətən de şpionaji, de narkotikə nomi ənədə tolışon bə zindononıjon dənuə,  hejoən sədo beşedəni.

Hələ ım kambu,  çəmə məholi tikə- tikə çəmə dasto səydən. Maştə paşo əmə ıştə məholədə bənə ğonəği bəbemon,  bəvədə har şe di bəbe. Hejoən hiç keşvəri sədo beşedəni, çaşən məkən benibəşe. Im çəvon problem ni,  ım çəmə ıştən,  çı Tolışon probleme. Əncəx tolışon ıştə keşvər çəvon kutədə mande bəzne. Əmə 1993- ci sorədə ənədə ğırbonımon doy ki, tolışonən ıştə mıxtoriyyət bıbu,  ıştə xəlqi peştədə bımando. Isət bə sə dəşedon boçi çəmə keşvərəti məhvıjon karde?

Çəmə mıxtoriyyəti bərpa karde çəmə mənəvi ğarze, şımə zındəyon ki, ım tam leqitim,  çı Azərbaycani həmən beynəlxalq konstitusiya ğanunon çərçivə dılədə bınobə qıləy mıxtoriyyət bə. Yəni TMMR- i leqitiməti çı Azərbaycani 1918- sorədə bınobə leqitimətiku ve barze, ımiyən Azərbaycanədə har qılə siyasətçi çok bəsə dəşedə.

Bıjio Tolış-Mığon Mıxtor Respublika! Boris Talışinski