Avqusti 19-də Boku İstintağ Təcridxonədə həbsədə bə Azərbaycan Demokratiya inən Rifah (ADR) Partiya sərdor Qubad İbadoğlu de ıştə xeyozoni vindemonış kardə.

Bın barədə əçe boə Qalib Toğruli məlumatış pevolo kardə.

“Həbsi 28-minə rujədə, nəhayət ki, Qubad İbadoğlu əvlodon dey vindemoni səş qətə. Vindemon dim bə dim ne, şişə peştono de telefoni unsiyyət oğəte səş qətə. Sıftənə təəssuraton tarsənine: Qubad muəllim vey lod bə, sifəti ranq təbii ni. Həbsxonadə tojə mərəzon “ğəzənc” kardə Qubad xırtə vəziədə anqılon be, beyrəqon funksiyon darşie, mədə neqativ prosesonku əziyyət kəşedə. Qəp jeədə nevrozi əloməton hiss kardə bedə. Həbsədə bə 28 ruji xuni təzyiğ, dıli je inən şəkər hiç 1 rujən normadə bəni.”, – ey votəşe.

Bə yod dəğandəmon Azərbaycan Demokratiya inən Rifah Hərəkati sərdor Qubad İbadoğlu iyuli 23-də həbs kardə bə. Əçe barədə 3 manq 26 ruj həbs qətimko tədbir vıjniə bə.

Qubad İbadoğlu de Azərbaycan Cinayət Məcəllə 204.1-minə (Bo həvate məqsədi hozzo karde , əz cumlə saxta pul və ya xarici valyuta bə dast varde və ya həvate), 204.3.1-minə (eyni əməlon mutəşəkkil dastə tərəfo kardeədə) maddon ittihom bedə.
Qubad İbadoğlu ittihomi ğəbul kardə ni. Ey, məhkəmədə bə nav doə ittihomon saxta beş bəyon kardə.