Vəyə 2 ruj bə peş – marti 17-də dəstqir kardə bə Mısılmon Hərəkati uzv Cavid Allahverdiyevi hukm handə bə. De Boku Qonə Cinayəton Məhkəmə hukmi, əv, 4 sor ozodətiku məhrum kardə bə.

Məhkəmə Cavid Allahverdiyeve vəynə de Cinayət Məcəllə 234.4.3 (bo həvate məğsəd kulli miğdarəda narkotik kırnie, oğəte) maddə de 234.1-1 (həvate məğsəd nıbe kulli miğdarədə narkotik bə daşt varde, kırnie, oğəte) maddəş əvəz kardə. de sıftənə maddə cəzo– 5 soriku tosə 12 sor ozodətiku məhruməti nəzərədə qətə bedə be.

Bə İttihomi əsas, Cavid Allahverdiyevi cifədə 33 ğram narkotik maddə bə. O, Biləcəri ğəsəbədə oğətə, peso bə 26-minə polis xonə bardə bə.

1996-minəl təvəlludin Cavid Allahverdiyev ıştəni taxsiko zınedəni, ın ittihomi saxta be idio kardedə. Ey, məhkəmədə, bə cıvonon çın mərəziku ozod be ro koməq kardeş bəyon kardə.