Jurnalist Nərgiz Absalamova bə polisxonə vanq kardə be xəbə doə bedə. Bo əyən bənə “AbzasMedia” direktor Ulvi Həsənli inən sər redaktor Sevinc Vaqifqızı icurə, de kontrabanda ittihomi cinayət ko oj kardə be votə bedə.

Dılətonə Koon Vəzarəti Mətbuat Xıdmətiku fakt təsdığ kardə bə.

Nərgiz Absalamovanın bə Xətai rayon Polis İdarə bardə be, vəkili nı be iddio kardə bedə.
Nərgiz Absalamova navədə bo “AbzasMedia” rəhbəron oj kardə bə cinayət koədə bənə şahidi damə kardə bəbe.

“AbzasMedia” sər redaktor Sevinc Vaqifqızı noyabri 21-də bə xariciku bə Boku orardeədə aeroportədə qətə bə. Əçe bə nav isə “AbzasMedia” direktor Ulvi Həsənli noyabrın 20-də istə kəy vədə bə taksi nıştiədə qətə bəbe.

Noyabri 20-də “AbzasMedia” ofisədə inən Ulvi Həsənli kədə, Sevinc Vaqifqızı qətə bə peş, bə şəv saat 3-də əçe jiə mənzılədə nəvəy bardə bə.
Sayti ofisədə 40 həzo avro pul peydo kardə be iddio bə. Ulvi Həsənli isə əyo pul nı be, 40 həzo avro bə ofis ey peydo karde iddio kardə kəson tərəfo noə be votəşe.

Həm Ulvi Həsənli, həmən Sevinc Vaqifqızı de Cinayət Məcəllə 206.3.2-minə (i qrup xonəxon tərəfo kontrabanda) maddə ittiham kardə bedən.
Sayti direktor muavin, ictimai fəal Məhəmməd Kekalovən noyabri 20-də qətə bə. Dı ruj nə əçe vırə, nəən ittihom kardə be barədə hıç qılı məlumat doə bəni. Noyabr 23-də Xətai Rayon Məhkəmədə əçe barədə dəstqirəti ğərar bekardə bə.

Çəvonədə hiç qılə ittihomi ğəbul kardə nin.