Janvarə mangi 18-nə rujədə “Azərtac”ozobiconiə dovlətiə xəbə agentəti xəbə doəş be ki, bə İsveçrədə Ozobiconi səforəti məlumoton əsosi İsveçrədə poçtə mərkəon vədoə bən ki, bə sıxanədə “Yanvari 20-ədə Bokuədə vağe bıə faciə” həsr kardə bən. Pevılo bə məlumətonədə ğeyd kardə bedə ki, İsveçrədə Ozobiconi səforətxonə iyən “İsveçrə Poçt” səhmdorə cəmyəti arədə mığovilə dəbastə bə ım mərkəon çapi barədə.

Əmə bəpe ğeyd bıkəmon ki, bənə hejo de Boku dovləti ğəlpə iyən aybinə təbliğoti mışğolimon. “İsverçə poçt” səhmdorə cəmyəti internetiə sayti tədğıği nəticədə gıləy vey mərağinə fakt bə məydon beşə. Im saytədə “Web Stamp” nomədə gıləy xıdmət mıvcude ki, de çımi vositə Boku tərəfiku pevılo bə mərkəon çap kardə bən. Bə pe nişo doə bıə xıdmət imkon dodə saytədə ıştəni ğeyd kardovnieədə mərkəon siforiş karde ki, har kəs zınedə de ıştə dıli piyəy dizayni bısoxto.

Deştə ıştə şikili iyən dizayni siforiş kardə bıə mərkəon 1-3 rujon mıddətədə de elektronə poçti vositə bə siforişəvoni vığandə bedən. Im xıdmət de pulie iyən i gılə jıgonə mərkə ğıymət əncəx i dollare. Əve, “İsveçrə poçtədə” har kəs zınedə ıştə dıli piə mərkə bısoxto iyən bo ımi ro lozim ni de poçti mığovilə dəbaste.