Bə yanvarə mangi 6-ədə bloger Mehman Huseynovi dəstək doe xoto dəvoniə bıə etirozinə yolə aksiyə vaxtədə həbs kardə bıə fəolon İsmayıl İslamoğlu, Goşgar Əhmədovi iyən Mete Turksoy ozod be bəpeştə çəvon mobilə telefonon iyən sənədon ogordıniedə nin.

Həmməy 3 gılə fəolon etirozinə aksiyə bəpeştə bə 20-25 sutkəninə zindonə cəzo məhkum kardəşon be.

Jurnalist İsmayıl İslamoğlu bə Turan xəbə agentəti xəbə doəşe ki, əvon Yasamal rayoni polisi 28-nə şobə koəkəon tərəfiku həbs kardə bıə bən. Jurnalist ğeyd kardəşe: “Həbsi vaxtədə çəməku həmməy çiyonışon səy iyən detobə ısət ogordıniəşon ni. Çəmə mobilə telefonon iyən sosial şəbəkəonədə səhifəon arıştə bən”.

Bə çəy sıxanon əsosi, əvon çand kərə bə “102” xıdməti mırocıət kardəşone, əmma bə hiç nəticə rəsə nin.