Davardə 2018-minə sorədə çı Azərbaycani devləti Naftə Fondi ıştə vəsaiton idorə kardeku bə fond omə ğəzənc 6 kərə kam bə. Fond iqlə səhmon idorə kardeku 42,9 (çılı dı tam, dadə nəv) milyon dollar bə ziyan eqınyə. Eksperton hisob kardedən ki, əslədə Naftə fondi rəhbərəti fondi vəsaiton de məharəti dələmurd kardedən. Əvon ğəsto bə curi layihon vəsait nodən ki, həminə layihon ya tam məhv bedən, yaanki muflis bedən və çı ğıymətinə koğəzon vıjoro beşedən. Eksperton bə fikədən ki, ehanə fond çı Revnəq Abdullayevi dızdə dastə dasto sə nıbo, çı fondi ziyon ha sor tikiən ve bəbe. Eksperton əyən bə nəzə rosnedən ki, SOCAR şirkəti natə birjadə boştəro qıləy ofşorə kompaniya okardəşe ki, həminə kompaniya rəsmən Azərbaycani xomə nati natə birjonədə həvatedə, əmmo faktiki SOCAR-i prezident de həminə ofşorə şirkəti dasti xomə natə pulon dızdie məşğule. SOCAR bə həminə ofşorə şirkətə xomə nefti har bareli çı vıjori realə ğıymətiku 6-7 dollar saru dodə ki, həminə ofşorə şirkətən ım nati bə vıjor de realə ğıyməti bekardedə. Həmonə 6-7 dollar çı SOCARİ rəhbəron arada paybaxş bedə ki, ımən har ruj çand sa həzo dollar pul kardedə.

Təsadufi niki bı rujonədə Azərbaycani elektron informasiya vasiton çı SOCARİ vitse prezident Mikayıl İsmaylovi Bokuədə 1 həzosə ve kə səy barədə məlumat doşone. Sıvoy bımi İsmaylovi Boku Hevsan ğəsəbədə bə 2 milyard avro  qıləy mılk, iyən Boku Turkan ğəsəbə dıyo kənoə əraziədə 100 hektarisə veyə əraziədə ğıymətış 3 milyard dollarisə ve 7 qılə ğəsr hestışe. Ehanə iqlə vitse-prezident çı SOCAR-o 10 milyard dollarisə ve pul dələmurd karde zınəşebu, bəvədə Revnəq Abdullayevi dastə çı SOCAR-iku dızdiyə pulon məbləği hiç aşmarde əbıni. Çanədə ki, SOCAR, Naftə fond çı dızdon dastədəy – nə SOCAR, nəən Nafti fond de mənfəəti ko karde nibəznen