Liki Vizəzəmini divoj, Vizəzəmini miyonə məktəbədə handə Cəlilov Teyyub Rəhməti zoə 1953 – nə sori Vizəzəmini miyonə məktəbi haftminə sinifış oroxniyəşe, çəyo bə Şamaxı Di Ovdomoni Texnkum dəşə. Əv vırə oroxniyəbəpeşt Liki rayoni Enqeles nomədə sovxozədə zootexnikış ko kardə.

Dı sor SSRİ ləşkərəvonəti sərbozəti kardəşe. Peş sərbozəti 1967–nə sori Şevçenko nomədə Kiyevi Dəvləti Universiteti Filoloqiya fakultə tələbə bedə. 1970–nə soriku Kiyevi Dəvlət Universtetədə ustod ko karde bino kardə. 1976 – nə sori elmon namizədi nomi səydə, 1983– nə sori doktorəti dərəcə səydə. 1985–nə sori bo kafedra  sərdorəti karde bino kardə. 1990–nə sori bə Ukraniya Rada deputat səçınyə bedə. Iştə jimoni elmi roədə noə professor 2011– ni sori ıştə dınyo ovaxtedə.

Xıdo tolışi jıqo kələntərə merdi ə dınyo bıdo, xıdo əy rəhmət bıko. Tolışə fərzəndon ıştə sərzəmono dəviləti holədə ğəribə vıronədə bı jıqo penə rəse zınedən. Ha, ısət boy ıştə sərzəmin Tolışstonədə hiç qılə qirəvəşon ni. Jıqo çe əvon jimoni bə siyopəlu tık dənoə çəmə zəmini tırkəçəmə mehmononin.  Bo çəmə milləti ənəndə perəxe əbıni, binim ıştə dəvlətmədorətiş bərpoş karde. Xıdo bə tolışi koməq bıbo! Amin.

Lik – Kiyev – Vizəzəmin.

Sərdor Bunyadov.