Moskva şəhərədə bə bə Tolış-Mığonə Moxtarə Respublikə 26-nə sorəgardışi həsr kardə bə gırdə miz dəvoniə bıə. Im mıhummə tədbirış Russiya Federasiya Prezidenti tono milləton arə mınosibəton şurə uzv Ismayıl Şabanovi deştə məruzə okardəşe. Im gırdə mizi koonədə mıxtəlifə tolışə təşkiloton rəison, tolışə xodimon iyən ruşinfikon iştirokışon kardə. Sıvoy çımi çan gıla co xəlğon milliə təşkiloton rəison iyən nımoyəndonən dəvət kardə bən, ə cumlədə  Rusiya, Osetiya, Gırcıston, Erməniston, Tatarston, Tacikiston iyən co kişvəron nımoyəndon ehandəşone, bə  tolışə xəlği çəşiruşini doəşone.

Tolış-Mığonə Moxtarə Respublikə 26-nə sorəgardışi tədbiri orəxədə gırdə mizi iştirok kardəkəson bə Russiya prezident Vladimir Putini, Russiya Federasiya milliə duma, İbə Milləton Təşkiloti iyən Avropa Şurə vığandə bıə deklarasiyə imzo kardəşone. Çı deklarasiyə mətnədə votə bedə: “Tolışon ki ım zəminon soybin hiç gılə huğuğonışon ni. Çəvon nə televiziyə, nə radio, nə rujomon, nəən jurnalonışon ni ki Boku dovləti tərəfo pul vadoə bedən. Tolışə zıvonədə mıkəmmələ miyonə təhsilən mıvcud ni. Məktəbonədə iyən universitetonədə tolışə zıvoni iyən mədəniyəti tədris mıvcud ni. Tolışə zıvon əncəx çand gılə məktəbon elementarə sinifonədə haftədə i kərə tədris kardə bedə. Çı tolışə xəlği tarıxən ğəlp kardə bedə. Tolışə tarıxiə şəxsiyəton iyən çəmə xəlği məşhurə nımoyəndon ıştənkini kardə bedən. Jıgo şəroitədə çəmə xəlği bo bə nav şe iyən ovc karde hiç gılə perspektivış ni”.

De ğəbul kardə bıə deklarasiyə tamə mətni TolishMedia informasiyə agentəti internetiə sayti urusə zıvoni baxşədə oşno be bəzneyon.