Musavat Partiya iyən Milli Şura fəal Tofiq Yaqublu istintağ mıddətədə dəstqirətiədə oğəte həniən 2 manq dıroz karde həxədə ğərariku doə apelyasiya şikati apreli 15-də Boku Apelyasiya Məhkəmədə diə kardə bə.

Siyasi fəali həxədə dəstqirəti ğətimko tədbiri 2 manq dıroz karde ğərar apreli 6-də Nərimanov Rayon Məhkəmədə doə bə. Həmonə məhkəmədə çoko bə, apelyasiya instansiyədən mustəntığe, hələ istintağ bə orəx rəşə ni votəşe. İstintağ dəvom karde qorə Tofiq Yaqublu dəstqirətiku vadoe məğsədin nıbe, istintağeku opırtiye, bə şə prosesi təsir karde ehtimolış dəlil vardə.

Tofiq Yaqublu vəkili, əçe dəstqirətiədə oğəte hiç qılı əsas nıbeş iddio kardə. De vəkili sıxanon, ey, hiç qılı cinayət kardəş ni.

Tofiq Yaqublu ıştənən, hiç qılı cinayət nıkardə holədə, de siyasi sifarişi 4 manqisə vey dəstqirətiədə beş bəyon kardə.

“Azərbaycani həmmə dələdızdon qırd bən mıni dələdızdətiədə ittihom kardən. Nə tı hakimiş, nəən ım, məhkəme. Omə əmri icro bıkə, çəyo bışi…”, – Tofiq Yaqublu məhkəmədəş votə.

Boku Apelyasiya Məhkəmə şikatış rədd kardə, Nərimanov Rayon Məhkəmə 2 manq ziyod kardə ğərarış ğıvvədə oğətə.

Tofiq Yaqublu dekabri 14-ku dəstqirətiədəy. Əv de Cinayət Məcəllə 178.3.2 (kulli miğdarədə ziyan jeədə dələdızdəti) iyən 320-minə (saxta sənəd hozzo karde və ya əçeku istifadə) maddon ittihom bedə. Əçe barədə bo sıftənəistintağ mıddəti ro 4 manq dəstqirəti ğətimko tədbir vıjniə bəbe.