Masali təhsili xonə edaştə cədvələdə jıqo bərmalə bedə ki, məvotbənən Masali miyonə məktəbonədə qırd ve nırəsə dərsi fəndon ımonin ; Texnoloqiya 13, İbtidai sinif 10, təsviri incəsənət ( vorəsənət) 10, kimya 8, azərbaycan dili 7 qılə sinif .

Çoknəy vindon Masali rayoni təhsili xonə bı reçədə Tolışə zıvoni vindəni, mande azərbaycan dili (tırkə zıvon) çəsponi nıvıştə. Əmə jəqonəyən zındəmon Ozobicon nomədə bı pesoxtə keşvərədə har çi pifəy. İyo dey odəmon bə iyəndı dim bə koy xoto çe ğəsto sıredən. Masal çe Tolışston səçınyə şəhəronədəy. Bı rayonədə 220 həzo əjiyon 90% ıştəni tolış zınedən. Bo çiçi bəpe iyo təhsili xonədə Tolışə zıvoni bə tələbon dərs doy roədə hiç qılə fam nıbu? Oxo ım Ozobicon nomədə pesoxtə keşvəri, pesoxtə sərdoron veyni tolışon sədə nun hardən.

Tolışon nəveminə soronədə çı dəvləti one roədə çand qılə mardışon doy. Sovı bımiyən Ozobiconi hukumət bəvədə Xərəboğədə jiə erməniyə əjiyon de tolışon dasati ğır dodəbe karde. Çı koyən orəx çoknəy bey vindımone. Xərəboği erməniyon bo ıştəro dəvlətışon onoy, əmə tolışon ısətboy mandimon bə bevəcə ruj. Binim çoknəy ımruj vindəmon, çe əmə zıvoni məktəbonədə tədris karde bə kaşi peqordonidən. Xosə tolışon ıştə kolo bınənən ıştə vədə, çok – çoki bışənən bə xıyə. Yolon jıqo votəşone: “Pandini nəv kəş hardə, ənəpandi nim kəşən harde zınəşni”.

Masal.

Sərdor Bunyadov.