Tolışstoni paytaxt Lankono bə İraqi Kərbəlo şəhər de velosepedi bo İmom Huseyni çılımi – “Ərbəini” ziyarəti roqardış bino bey. Bı roqardışədə Lankoni i dastə şiyə mısılmonə əjiyon həşedən. Əvon bəpe detobə çılımə ruji ıştəni bə Kərbəlo bırosnon. Roqardış Lankoni Yolə vıjori məsçidi vəyku bino bıə. Lankoni sipirişon bə ro dəqınyəkəson xəy – dıvoşon doə.

Jəqonəy peqəteyədəy ım qılə normal, çoknəy bəvoten bə Xıdoən, bə bəndəən xoş omə koy. Mande iyo qılə kaşi heste. Çandi çand sorone bə Kərbəlo ziyarət şəkəson de ıştə Ozobiconi pərçəmi peqətedən. Odəm mandə hədəyon bı odəmon çiç bıvoto? Oxo kom keşvəri milləton de ıştə pərçəmi bə Kərbəlo ziyarət şedən? Imon bo çiçi bəsə dəşedənin ki, ım Ozobiconi ısətnə pərçəm çe tağuti pərçəme, binim inqilisi qeneral Tomsoni vardəşe bo əvono.

Im beməxonən har sor çe inqilis Tomsoni bo əvono soxtə pərçəmi peqətedən şedən İmom Huseyn səpe ki, haydə İmom Huseyn Xərəboği oqordon bə əmə, əmoni ruje! Bə Kərbəlo iqlə de İmomi pərçəmi roqardış bakan. Im deşmenon bə çəmə əğıydə dağandə Tomsoni pərçəm sovı bədbəxtəti hiç çi əvəni bo şımə ! Imi ıştə viro beməkənən!

Xıdo bə əmə həmə İmom Huseyni sərostə, sərisofə ziyarət karde ğısmət bıko!

Lankon – Yolə vıjor.

Sərdor Bunyadov.