Kələntərə İroni sərvil(paytaxt) Qəzvinədə şah  Xudabəndə jidəbe. Çe şah sə-bınış nıbə dəvlətış hestbe, mande əv ıştəni bədbəxt osəmedəbe, çumçıko qiraminə Səfəviyon tumi damədəbardə zoə fərzəndış nıbe. Bə ım səbin əv har sor rujə əqəti. Bə Xıdo dıvo əkəy ki, bəy  zoə bıdə.

Orəxədə ım dıvon Xıdo məsəşe. Rəbədə maştəvo nımoji votəbəpeşt şah Xudabəndə ıştə rotədə nıştəbe, tasbi qordonidəbe, Ğıron handəbe. Hejo bı ləzədə qılə royku dəvuş ozik oməy:”Yahuuuu, ya movla! İmom Əli xoto bə dəvuşi pay bıdənən!” Dəvuşi sədo məsə şah bə ıştə vəziri votışe ki, dəvuşi piyəy bə vırə bırosnon.  Mande dəvuş bəy edaştə pulış nısəy, votışe: “Sərisofə dəvuşon pul peqətdənin, bə ıştə şahi boli-puriyəti  iyən xəşəconi nocə kardən, bəy xəy-dıvo doydən.Əve az zərım pidəni, podoşo ıştəni vinde, bəy səm jəy pidəme”

Şahi dəvuşış bə rot vanqış karde, dəvuşi bəy maştəvo ovandon b, ıştə cifo qılə sııbo votışe, çəyo ıştə kəşəbınədə qılə sefış bekarde, bə şahedaştışe:” Az iyo bo ıştı zəri, telə omənim. Oməm ki,  bətı bı nezonədə ıştı zoə fərzəndi bə dınyo omə şoyə rımuzi bıdəm, binim tı əvı bəşəv-bəruj Xıdoku pidə. Əynə şəvi dastnımoj bıqətiş, de rexət nımoj bıvotiş, da bəjən “Ayətul-Kursi” iyən “Yasin”- i  handə bəpeşt ım sefi nimə tı, nimə şahxanım bəhə. Çəyo de əy sə i bıkəyş. Şımə ım vindemoni nəv manq, nəv şəvıruj,  nəv saat bəpeşt qılə zoə fərzəndon bə dınyo bome. Çe əy nomi Əbos bınəyş. De ıştı zoə bə dınyo ome İroni dəvlət ovc bəkarde. Iştı zoə İroni şahon qırd kələntəri bəbe.  Əv bo ıştə əjiyon ve foydəninə koon bəkay, çe əvon jimoni rohət, ıştə keşvəri marzon tikəyən her – hevuj  bəkarde”

Imoni votə dəvuş çəşo qin be. Dəvuşi sərisofə dim, foydəmandəti, dılısoxtə nocəon, pul penıqəteku bə dırıstə odəmi mandəbe. Şah Xudabəndə sərəsəy ki, ım imom Sahib-əz-Zamanebən, oxo əv bə  sərisofə, ənəqınoə şiəon çəş çidə, çe əvon nocəon bə co vardedə.

Şah ım ğəziyəş bo ıştə jeni- Şahzodə-Saltani qəpış jəy, çe əy dıli lorzoniyə şəkbəluyə koən votışe. Əvon dıynəən norohət bin. Şahxanım şoy-voyku bəmedəbe. Iştə hanı-hıtış qin kardəbe. Mande şahxanımi norohətəti qırd bə beko be: dəvuşi şeyku ənəhoy vaxt dənıvarde ki, şahxanım bə əğıl mande. Iştə vaxtədə bə dınyo zoəş varde ki, çe əy nomışon Əbos noy

Rusi zıvonədə qırdəkə: Teymurbəy Bayraməlibəyov

Peyəqordon: Diana Montgomeri