Orəxnə dı – se rujədə Ozobiconədə kadron ovaxte hol bə dəb dəşə. Ha jəqoy, bə dəb dəşə. Çumçıko bı vironə keşvərədə har çi bəpe bə dəb dəşu. Qirəm ənədəb qıləy çi damandoş karde, rəyrə pəşimon bəbeş. Əve har çi de dəbiey bı vironədə. Timsal hejo bıvotəmon, Bokuədə hukuməti taxtədə nıştəkəson vırə rokirovka karde ya kalikəson bə təqaud vığande. Hejo peqətəmon Ozobiconi prezidenti adminstrasiya sərdor Ramiz Mehdiyevi çe koyku bekarde , çəyo əy bə Ozobiconi Milli Elmon Akademiya sərdor noy. Oxo Ramiz Mehdiyev 83 sori dılədəy. Im çoknə ko bedə ki, nav əy Milli Akademiya sərdorətiədə ko kardə odəmi 85 sorış hestbey?! Ime çe əvon bardə  kadri siyasət?

Jıqo qılə hol iqlə Bokuədə ni. Peqətəmon hejo Masali rayoni iyən çe rayoni icra yol piəmerdə Rafil Huseynovi. Im odəm bəpe ısət bınışto de ıştə nəvə – nətincon hənək bıkə. Sıxan ni bımiku de nəvə – nətincə hənək karde hol çidəni, iblisəti çe əy dimo ru bedə. Mande əv hələən Masali talan kardə. Bəs əy kəynə bebakan? Çe Masali rayoni icra yoli iminə nimsərdor Nadir Abıyev? Im Nadir Abıyev çe əmə diy tıbəso dılədə beşə bəlelə doysən ve sorış heste. Jıqo bızın , ım vırə bəyo onoə bıə ki, Nadir Abıyev hejo bınışto iyo ıştə ruji dəvono. Ve odəmon nomi bı reçe dənoy bəbe. Mande bı bəjən iqlə de Nadir Abıyevi oroxnidəmon. Qirəm bıpiyone, Masali rayoni co pulxoron barədən bo şımə qəp bəjemon. Hələynə Nadir Abıyevədə mandəmon. Diəkəmon çiç bedə….

Sərdor Bunyadov.