“ParsToday” informasiyə agentəti xəbə dodə ki, martə mangi 18-ku nati məzənnə bə 20 dollar egıniə.

“Brent” markaninə nati 1 barel isə bə 24 dollar həvatə bəbe. “Maide.az” xəbə dodə ki, ım , 2002-2003-minə soronku jıgoşə ən saruə məzənnəy. Nati ım ğədər erjonəti koronavirusi bə dınyo pevolo bıe səbəbiku biznes fəaliyyəti və insonon hərəkəti kam bıe nəticədə bə nati tələbatiən kam bıədəy. Dıminə səbəb Səudiyyə və Rusiya devləton ıştə natə hasilati ziyod kardeədey.

Dınyo təhlilgəron ehtimal kardedən ki, ım məzənnən hələ sabit ni, əv tikiən erjon bıe bəzıne. Jıgo vəziyyəti bə valyuta vıjoriən ciddi zərbə jəşe. Moskva birjadə 1 dollari məzənnə 80 rublisən dəvardə. “Azadlıg.org”-ən nıvıştedə ki, orəxnə həftəonədə Az.R-ədə bə dollari tələbat xeyli barz bıə. Imən de mənoti devalvasiya ehtimali əlağədare. Boku hokumətən bənə Nigeriya və kali Xəlicə devləton ıştə milliə valyuta sabit oğətə imkaniku istifadə kardedə. Əmo mustəğilə iğtisadşinason vahid fikir jıgoe ki, mənoti məzənnə sabit ogəte mumkun nibəbe.

Bımi ro ən yolə argument əve ki, Respublika ımsornə budcədə nati gıymət 53 dollar nəzərədə gətə bıə. Ey 2 kərəsən vey saru egınie mənoti devalvasiya labud kardedə. Çunki ımsornə budcə təğribən 70% de natə pulonku omə mədaxili pur bənine. Nati məzənnə ım ğədər saru egınie xarici məmləkətonədə benzin və kali digər sutemonon ğıymət saru eğandəşe.

SOKAR-iən jıgo gıley hərəkət kardışe, “Aİ-95” və “Aİ-98” markaninə benzini ğıymət 1mənot 50 kopikiku bə 1 mənot 20 kopik və 1 mənot 60 kopikiku bə 1 mənot 40 kopik eğandışe. Əmo ən vey istehlak bıə Aİ-92 və mazuti gıymət erjon nıkardışe. Təhlilgər Natiğ Cəfərli bo “Sputnik Azərbaycani” gəp jəşe ki, 95 və 98 markaninə benzinon bo lyuks avtomobilon nəzərədə gətə bıə, ey erjon karde bo çəmiyyəti və iğtisadiyyati anəhoyən foydəş nibəbe.