Boku hukumətı hıcum bə Ermənistan ki Ermənion mudafiə iyən çand kəs Ozərboyconı nizami ğıvvon kışte səbbəb be, co siyasi iyən əmniyətinə ziyononiən Boku hukumətıyo təşkilışon ka.

Həmzəmon de ın nizamiə təcavuzkoətion itirazoniən Ozərboyconı muxtəlif şəhəron əcumlə Bokuədə rost bin. əgərsə ın itirazon sıftədə de ın diktətorə rejimı naduzgunə siyasiyə hərəkəton goroş təşkil bin əmmo idomədə fisodkoəti, demokratika poymol karde, co xəlğon həxi nəzədə nıgəte iyən jığonə fikon tərəfdaronən şe-şe bə meydon dəşin iyən ıştə itirazon idomə doydən.

Gıləy ənmuhimə şəhəron ki tojədən bə itiraz dəşən çı Tolışıstonı poytəxt Lankonı xəlğı itiraze. In şəhər Tolışi milliə hərəkətı mərkəzbıe səbəb siyasi iyən idologiya nəzədə ve həssosə məntəğəy. Ozərboyconı ısətnə hukumətı zidd hərəkəton idomədoeku bə kəno, ın potensiyalış heste ki Tolışi milliə hərəkəti şələ ruşinkardeyoən gıləy gardışi noxtə bıbo.

Zinə dəvardə çoşanbə rujədə ki hələ cangi otəşon okışyə bə nıbin, Lankonədə i gorop təblığəkə cıvonon ki ın şəhəri xəlğı bə Boku hukumətı zidd miting təşkilkardeyo dəvət kardedəbin de əmniyət polisı vəsilə gətə bin. To bə ın ləhzə dəğiğ miəyən bə ni ki ın goropı əncəx Lankonədə Əlievı diktətorəti rəğı bıryeyo təşkil bedəbe ya ın ki de Tolışi milliə hərəkəti əsos məğsədışon hestbı.

Əgərsə ın hərəkət məvuji hukumətı zidd hərəkət be əmmo kali ğəyri rəsmi xəbonən ın məsələ de Tolışi milliə hərəkəti angıl jedən. Harholədə ın hadisəku heç kəs kamil iyən sərost xəbəş ni. əmmo ə çiy ki ve mıəyən iyən ruşine ıme ki Boku hukumətı zidd hərəkəton Ozərboyconı həmmə şəhərondə bino bedən. Isət de itirazon şələ rostbıe bəpe ın ulkə siyasi vəzyətdə tojə məsələoni çəş bıkəmon.

Boku diktətorə rejimı zidd itirazon şe-şe bə Tolışıstoni şəhəron rəsedən

Zinə dəvardə çoşanbə rujədə ki hələ Ozərboycon iyən Ermənistanı arədə cangi otəşon okışyə bə nıbin, Lankonədə i gorop təblığəkə cıvonon ki ın şəhəri xəlğı bə Boku hukumətı zidd miting təşkilkardeyo dəvət kardedəbin de əmniyət polisı vəsilə gətə bin.

Boku hukumətı zidd hərəkəton Ozərboyconı həmmə şəhərondə bino bedən. Isət Lankonədə de itirazon şələ rostbıe bəpe ın ulkə siyasi vəzyətdə tojə məsələoni çəş bıkəmon.

TolishMedia