Tırkiyə Ğərəboği cangədə iştirok kardedə, Miyonzəmini dıyoədə iyən Kiprədə çəy hərəkəton beynəlxəlğə huğuğiə normon ziddin. Bə TolishMediə informəsiyə agentəti muxbiri məlumoton əsosi, çımi həxədə çı Yunanıstoni xariciə koon vəzir Nikos Deniasi Bratislava şəhərədə de ıştə slovakə həmkor İvan Korçaki vindemoni bəpeştə elonış kardə.

N. Deniasi ğeyd kardəşe ki, əy bə ıştə slovakə həmkori Miyonzəmini dıyo şərğiə baxşədə vəzyət, məntəğədə çı Tırkiə beğanunə hərəkəton edaştəşe iyən votəşe ki, Tırkiə bə beynəlxəlğə huğuğiə normon pape bedəni.

Çı Yunanıstoni xariciə koon vəziri elonış kardə: “Əmə Bandi Ğərəboği cangi həxədəən gəp jəmone, ğeyd kardəmone ki, ım mınoğoşə xəyli xətomande. Çəmə regioni har gılə bohranədə bıə gıləy vey mıhumə element heste, ım Tırkiyəy. Tırkiyə de zuy bə Suriya, bə İrak dılə dəşe, Tırkiyə cihadiston bə Liviyə vığandışe, ısətən Tırkiyə Ğərəboği cangədə iştirok kardedə. Tırkiyə çəmə regionədə eğrorəti loxniə elemente.