1-minə baxş

De Boku panturkə rejim iyən Ğərəbağı cangı sə bıe, çı Bokuədə xəlği şoətiədə Turkiyə iyən İsrailı boydəğonən səy sə rost kardəşonbe.

Əziz handəkəson ımruj pidəme ki çı İronı İslamiyə Respoblikə iyən İsrailı hamsuəbıe barədə de şımə sıxan bıkəm. Gasbo ın məsələ boşıməno tikəy ruşin nıbo əmmo ın sıxan duze, boçi ki Boku hokumət deştə hıcumon bə ğərəbağı cənobi məntəğə kali vıroni bə dast dəvonişe ki ıştə marzon de İronı dıroz kardəşe. In cangədə çand həzo kəs kıştə, yarəjə yaən avərəbən. əlbəttə ki ve nizamiyə avjoronən har dı tərəfiku rıjniyəbən iyən se kərə cangı otəşı səkardeən ləğv bəy.

Isət sərost vote bəbe ki Ozərboycon Respublikə xuni-xuniyə hıcumon bə Ğərəbaği məntəğə gıləy nəticəonən ın be. əgəm şımə yod də mandə bıbo, çand haftə çimiku ba na votımone ki Ğərəbağı ın cang de nakonə cangon çand gılə muhimmə təfotış heste. Siriya təkfirion, Turkiyə nizami ğıvvon, səhyonist rejimı kıməgətion bə Boku iyən soşiyal mediyadəən de İron İslam Respublikə zidd fəaliyət karde ın cangı fərgı de nakonə cangon nişo doşe. Siriyavıjə teroriston iştirak karde, İsrailı dıronon iyən Turkiyə əsgəronku istifodə karde ın cangı bənə gıləy manevr nişo doşe ki gasbo ıştəni de İronı cang kardeyo hozı kardəbin. əlbəttə ki ın cangı sahədə İsrailı dıronon nıfuz bə İronı xok, nez bə sa gılə bombə iyən raket bə İronı sərhədon jıe əncəx de ın məğsədi əncom bedəbe ki ın ulkə nizami avjoron iyən ğıvvətmandətiku xəbə bıstənın.

Əgərsə Boku iyən Ankara cəhd kardəşone ki ın cangı məğsədi əncəx Ğərəbağı məntəğə bə dast dəvoniye məsələ təblığ bıkən əmmo muxtəlif səbəboni nişo doydən ki ın cangı məğsəd co be, əvən İronı ulkə tarsoniye, ki əlbəttə Boku iyən Ankara ın roədə de İron iyən İsrailı həmmarz kardeyo bə nəticəoniən rəsəyn. Isət çəmə ın təhlil bə nəticə nez bedə ki həmmə Panturkiyə goropon əktivəti iyən kali İronı zidd goropon fəaliyətı şiddətinbıe əcumlədə nışunəonku bəhisob omedəbin ki de İronı cang karde senari məğsədi nişo bıdən.

Bə yod biən ki əgərsə 1991-minə sorıku to bə 1994-minə sorədə İronı kıməgətion yaən mudaxiləon bənıbin gasbo Ermənion bitun Ozərboyconı xoki ıştə dastədə dəvoniyedəbin iyən ısət gıləy ulkə de Ozərboycon Respublikə nomən dınyo xəritədə nıbe. Əmmo Boku hokumət ki to bə ısət ıştə ulkə xokiku çı İronı zidd cəsusəti karde goroş bəhr bardedəbe, jəğo ki İsrailı dıronon çı İronı nizamiyə mərkəzonku cəsusəti bıkən, ımruj de Boku rejimı vəsilə iyən kali Ğərəbağı cənob məntəğə bə dast dəvoniye ıştə fəaliyəton ve zumand idomə doydən. boçi ki ısət ‘’ İsraıl gıləy xal çı Əlivı panturkə rejimıku səşe, əvən çı İronı marzon kənoədə deştə siyasi, nizami iyən əmniyətinə mərkəzon təşkil karde de İronı hamsuə bedə.’’

İsa Tolış