Çı Avropə Şurə Parlamentə Assambleyə navkonə uzv Luka Volonte yanvarə mangi 11-nə rujədə de rışvəxorəti ittihomi bə 4 sornə zindonə cəzo məhkum kardə bıə. Çımi həxədə bə İtaliyə “La Repubblica” rujnomə məlumoton əsosi TolishMedia informasiyə agentəti muxbir xəbə doedə.

Milan şəhəri məhkəmə Volonte Ozobiconi 2 gılə siyosiə xodimonku nimə milyon avro seədə ittihom kardedə. Məhkəmə isror kardedə ki, Volonte ım məbləğış bo 2013-nə sorədə Ozobiconədə siyosiə məhbuson həxədə Avropə Şurə Parlamentə Assambleyə (AŞPA) məruzəy ğəbul bey navi gəte xotə səşe.

Bə məhkəmə ittihomon əsosi, Volonte 2,4 milyon avro bə dast vardəşe, əmma əncəx nimə milyon avro se fakti sıbut karde de ovandi bə sə omə.