3-minə baxş

12. kali kəson hestin ki Tolışə məntəğədə Veynə xəlğı Tolışbıe barədə şəkışon heste! Duze ki Ostoroədə veynə xəlğ Tolış nin, əmmo ın şəhər iyən əçəy ətrofədə umumən veynə xəlğ Tolışin. Hətto de ve dığğəti Tolışə məntəğəku tobə Sıpiru ğərbiyə baxşı Tolış unvan karde roste.

Tati iyən Tolışi zıvoni arədə 90 fayizı sə ve iştirok heste. Har holədə de zıvoni-milli ceogırafiyə əsos Rezvanşəhər, Lisar, Əsalem, Masal iyən Şanderminı veynə əholi Tolışonin. Bı holədə veynə Ərdəbilı cəmoətıku(Ənbəran, Vilkic, Şahrud iyən Xəlxalı kali məntəğəon) Tolışonin.

Əlbəttə ki Tolışə xəlğ Fumən, Şəft iyən co vırondəən jidən. Jəğo ki zındəmon Ğərbı Azərboyconədə Tırk-Azərion veynə cəmoət nin iyən Xozestanədə veynə xəlğı zıvon Ərəbi zıvon ni. Həğiğətdə davləton de stıratejinə pılanon əsos ıştə ulkə muxtəlif baxşon deştə milli mənfəəton əsos pegordınedən.

Co tərəfdəən vote bəbe ki ve ğədimnə xəlğoni bənə Tolışə xəlğı gıləy ostani soybbıe pırablem bo co xəlğonyo çiçe? Yaən deştə ostanı soybbıe kon xəlği həxon poymol kardən?! Çoknəy ki Azəri-Tırkzıvonon, Loron, kırdon, Bəloçon, Sistanıjon, Giləkon, Mazənion, Semnanıjon, iyən co xəlğon har gıləy 1 gılə yaən çand gılə ostanışon heste əmmo Tolışon deştə məxsus ceogırafiyə iyən co çokə vəziyəton, gıləy ostanışon ni? Ruşine ki bı ostan(yəne Tolışə ostan)ədə co xəlğon bənə Azəri-Tırkon iyən Giləkon mədəniyətən hifz bedə.

De Ozərboycon Respublikə statistikə əsos to bə 10 sor bə nav, 125 həzo Tolış Ostoro ru şimalədə iyən Ostoro, Lankon, Cəlilobod, Leril iyən Yardımli şəhərondə jidəbin. Əlbəttə de ğəyrı-davləti mənbəon əsos Tolışon əholi Ozərboycon Respublikədə 1.500.000(i milyon-o pencsa həzo)kəs bedə.