Lozıme bıvotdəmon ki Səvet Hokumətı pevlobıe vaxtədə, mədəniyəti inğilabi ali şura sıftədə ıştə gıləy sənədondə “Aran Respublikə“ ifodə nıvışdəşbe. Çəyku bə nav –Teymurtaş- çı İronı bə vaxti 1-minə vəzir, bə vaxtədə ki bə Mohəmməd Əmin Rəsulzadə mali kıməgəti tələbkarde məktubi nıvıştedəbe “Badkubə Respublikə“ ifodə nıvışdəşbe.

Teymurtaş bə Təğizodə nıvışdəşbe ki:
Musavat dastə ki əçəy lider Mohəmməd Rəsulzadə de İronı dustəti nışodoe pidəşe, iyən əmə de Səvet hokuməti dışmenəti kardeyo dılvandi doydə iyən ın dastədə bıə İronıjə uzvon bə rəğbət vardedə; Hejo ki “Badkubə“də hakim bəy de İronı ənyolə dışmeni unvan be iyən bənə sıpəon dərıvə həmmə xəlğı guşon kor kardedəbe. Ozərboyconı nomı bino kardeən ın Rəsulzadə iyən əçəy həmron əsəronku be.

Musavatıjon gıləy siyasiyə vəsiləin ki əmə əlbəttə de ın siyasətı lideron dustimon əmmo de əçəvon siyasəti ziddimon. Əlbəttə de Turkiyə dustimon əmmo rozi nimon ki Turkiyə Ğəfğazı məntəğə ıştə ihatədə bıgəto. Teymortaş idomə doydə ki, Turkiyə pidəşe Ermənistan iyən Georgiyəən əçəy ihatədə bıbon.

Isət jığo bəbe vote ki “Boku Respublikə” iyən “Aran Respublikə” har 2 gılə ifodə çı İronı tarıxiyə sənədonədə tədovulədə be, nəticədə ın sıxanon iyən ifodon sa sor tarıxışon heste. Heydər Mirza (əmniyətinə tədğiğon iyən xariciyə siyasətı təhliləkə) ıştə gıləy nıtğon i baxşədə çı Vaşington DC şəhərı “inernational iyən stıratejik tədğiğaton mərkəzədə” jığo votəşbe:

İron çı Ərəsı kənoədəbıə məholon to bə şimali Ğəfğaz məntəğə ıştə tarıxi sərzəminonku zınedə iyən kali kəson İronədə “Ozərboycon Respublikə” ifodə de Ozərboyconı nomi zınedənin. Ve vaxton baş gətedən ki “Boku Respublikə” ifodəku istifodə bıkən.