TolishMedia informasiyə agentəti muxbir Boku şəhəriku xəbə doedə ki, kıştə bə ozobiconıjə əsgəron bo ıştə fərzəndon dəfni fəxriə mərosim icro karde tələb kardedən. Əvon etirozinə aksiyə təşkilışon kardə iyən de Mıdofiə Vəzorəti rəhbərəti vindemon tələb kardedən.

Ko əve ki, çəvon fərzəndon “Şəhidon xiyobonədə” dəfn kardeyku imtino kardedən. Turan agentətiən çımi həxədə nıvıştedə ki, dəfni fəxriə mərosimi əvəzi cangədə kıştə bə əsgəron əksəriyət sərşəhər Bokuku diəroədə bıə Garadağ rayonədə dəfn kardə bən.

17 gılə xıyzonon uzvon hukməti bina vədə gırdə bən iyən ıştə problemi həll karde tələb kardedən. Əmma valideynonışon bə dast dəğandə iyən bə Salyan hərbiə hissə vığandəşone bo de mıdofiə vəziri mıovin Kərim Vəliyevi vindemon karde ro. Əmma vaxtı ki, etiroz kardəkəson bə hərbiə hissə rəsəyn, bəvon votəşone ki, K. Vəliyev əyo ni. Çımi nəticədə etiroz kardəkəson çı şəhəri ən yolə prospekton gıləyni bastəşone. Əncəx çımo bəpeştə Mıdofiə Vəzorəti əvonış ğəbul kardə.