TolishMedia informasiyə agentəti muxbir xəbə doedə ki, bə ParsToday-i tolışə sayti məlumoton əsosi, Ğərəboğədə terroriston iştiroki məhkum kardey barədə Avropə tojə sadir bıə bəyonot çı Ermənistoni rizoyəti cəlbış kardə. Bə TolishMedia sayti raporti əsos, Ermənistoni xarıciə vəzorətxonə sıxanəvoti votəşe:

“Avropə şurə bə erməniə əsiron ozodəti vey yolə əhəmmiyət doedə iyən təkidış kardə ki, Ozobicon Respublikə cangi cinoyəton bəpe be cəvob nımando”. Anna Nağdalyani əlovəş kardə: “Tırkiyə bəpe Ğərəboğədə hərbiə mıdoxiləonku dast bıkəşo iyən Ğəfğaz məntəğədə ıştə bestabiləkə siyosətonku imtino bıkə”.

Ermənistoni xarıciə koon vəzorəti sıxanəvoti ijən Ozobicon Respublikəyku tələbış kardə ki, Ğərəboğədə bıə erməniə mədəni, tarıxi iyən diniə əsəron xərob kardeyku imtino bıko iyən bə ım məntəğə humanitarə koməkon vığande icozə bıdə.