Səlom Lələ.

-Səlom çımı balə.

Lələ bəbe ome?

-Ço nibəbe çımı balə, boy. Çiçsə bəə?

-Lələ….

Çiç bə çımı balə? Nənə noxəşe?

-Ne Lələ,nənə çoke,…imtasi…

Çımı balə, çiçbə, bıvot, çəmə dıli mətokın.

-Lələ,,,az Tolış bem pidəni.

Boçi çımı balə, tolış be jəqo exrocətiye ki, tı bəyku imtino kardəş?

-Lələ, tı bəmı votəbe çımı səhhət bəmı imkon doydəni bə internet dəşum, feyzbukədə bıbum, arədə dəşi bə feyzbuk, tolışon həxədə bəmı xəbə bıdə.
Azən çan vəxte dəşdəbim bə feyzbuk, bə tolışon nıvıştəyon diyə kardəbim, əncəx bəşmə hiçi votdənıbim.
Vallah lələ, tolışon feyzbukədə yəndı ancedən, biyabru kardən. Dımjoni iqlə bə i kupuke.Dırıst rısvoyçiətiye, ıştənən ıştə statuson veyini tırki zıvonədə nıvıştedən, xəcolət kıştə mıni.

Haaa. çımı balə, bə sə dəşem. Tı Çəmol Lələzoə zındəşəni, çəmə yolə ənvışte, tənqidəvone.
-Haa zındəm Lələ.
Cəmol Lələzoə qıləy sıxanış heste, votdə balə, tı bə cəhəndımən bışuş, ıştı rişə tolışe, ıştə tolışəti niyon karde əzıniş.
Mandeki, bə iyəndı ğır kardeee, ha çımı balə, rost votdəş, çə tərəfo əmə siyodimimon. De co xəlqi insonon qəp jəyədə bənə pəsimon, əmmo bəştə xəlqi rəsdəmon, bə şir-pələnq peqardəmon.
Çəmə sıxanon bə iyəndı bənə qullə qındən.
Çımı balə, tı bəvon ve fik mədə, əvon bə avropə inteqrasiyə beşon pidə. Tı ıştə dərson bahand, həni bə feyzbuk dəməşi.

-Lələ, bəştı yod omdə, qıləy icra hakimi boştə kəbinetiş codi doəşbe karde ki, vəzifədə ve bımando, votdəm qasbu odəm feyzbukədə elan bıdə, tikəy pul qırdəkə, bo tolışon ğıstoğəti codi bıdə karde.

Çımı balə, bəpe iminnə nubədə az ıştə cifo xəyli pul xarc bıkəm, boəvonro codi bıkəm ki, əvon pul bıdən, çəğın bo çəvon ğıstoğətiro codi bıdəmon kardeəni. Çəvonku boştə xəlqi pul səy bedəki? Pul bə kəsonən bənə tı tolışətiku beşedənəni.

-Lələ bəs çoknə bıkəmon? çımon vəy səy lozime, tikən dəvarde bə ivrə qırdə bə penc-şəş kəsiən yəndıku ebəsındınen.

Çımı balə, tı bışi ıştə dərson bahand, ənədə biaburçiəti səbəbən besəvodətiye, səvodinə odəm ın oyni nibəje. Tınən çokı handə bəbəy, nəvotiş codi bıdəmon karde, az tolışətiku beşem pidə.
Tolış be de kefi ni, tolışəti de xuni dəvardə. Səvodinə tolış hiç vəxt ıştə tolışəti niyon əkəni.

-Çok lələ, bıbaxş mıni, az şımə fəxr kardə tolışədə bəbem. Bışum ıştə dərson bahandom.

Çok balə, bışi, azən bə tolışi zıvon peqordıniyə bə multiki diyəkəm, əğlon ənə əziyyətşon kəşə, hiç nıbu diyəkardəkəson aşmard iqlən ve bıbu.

Fuad Mondiqovıj