Boku şəhəri apellyasiyə məhkəmə ruji bə nav internetə sayt “xaberman.com”-i təsisəkə iyən sər redaktor Polad Aslanovi həbsi şikatış bə mızokirə noəşe. Polad Aslanovi dovləti xəyonətədə ittihom kardə bedə. Bə çəy jen Gulmirə Aslanova məlumoton əsosi, ıştə şuyə ijən ıştənış mığəssir zınəş ni.

Əy məhkəmə prosesi vaxtədə elonış kardə ki, əv bə Dovlətə Betəhlukəti Xıdməti koəkəon beğanunə fəoliyəti həxədə məğaləon dərc karde xoto təğib kardə bedə.

Məhkəmə çəy şikatış rədd kardə iyən Polad Aslanovış həbsədə haştə.

Bə yod dəğandəmon ki, iyunə mangi 13-nə rujədə “xaberman.com” iyən “press-az.com” internetə sayton təsisəkə iyən sər redaktor Polad Aslanov həbs kardə bıə be. Əməliyot-istintoğ tədbiron nəticədə guya bərmalə bıə be ki, 30 sininə Polad Aslanovi xaricədə de xariciə kəşfiyoti xıdməton əməgdoşon niyoniə vindemonon dəvoniəş be, pulon gəte həxədə çekon imzo kardəş be iyən niyoniə əməgdoşətiədə iştirokış kardə be.

Ğeyd bıkəmon ki bə Polad Aslanovi mınosibətədə bə Ozobiconi Respublikə cinoyət məcəllə “Dovlətə xəyonəti” maddə mıvofiğ cinoyəti ko okardə bə iyən əv həbs kardə bə.