Beynəlxalq Jurnaliston Mudafiə Komitə jurnalist Vuqar Məmmədovi ozodəti tələb kardə bəyonətış doə.

“Azərbaycani hakimiyyət jurnalist Vuqar Məmmədovi dəstqirətiku ozod kardəni, bə ictimaiyyəti marağon cəvob doə məsəlon barədə məlumat pevolo karde qorə jurnalistonku ğisas se oğətənie”.

Bın barədə ğərargo Nyu-Yorkdə bə Jurnaliston Mudafiə Komitə (CPJ) iyuli 28-də pevolo kardə bəyonatədə votə bedə.

Sənədədə, iyuli 24-də Boku Nərimanov Rayon Məhkəmə “Hurriyyət” xəbə agentəti sər redaktor Vuqar Məmmədovi de hərbi band ğədəğən bə məlumat pevolo karde qorə 30 sutka dəstqir kardə be ğeyd kardə bə.

Məhkəmə ğərarəda Məmmədovi bə polkovnik Elnur Məmmədovi se musahibə istinod kardə bə, ən oxonə, iyuli 19-də əçe Azərbaycani ərteşədə vəziyyəti tənğıd karde, mudafiə vəzir Zakir Həsənovi bevəc idarəkarde inən korrupsiyadə ittihom karde bə nəzə rosniyə bedə. Elnur Məmmədovən de eyni ittihomi 30 sutka dəstqir kardə bə.