1942-minə sori fevralə manqi 22-ədə rayon Lankoni Velədiədə moəobıə. Mirqasımi zoə Mirheydər Mirəhmədovi bə məxsusə təqdimati ehtiyoc ni. Lankonədə yolən-rukən əy çok zıneydə. Nuperəson, cıvonon çəş okardə-vindəşone ki, Yolə vojori nezi, Universiteti kuçə peyədə qıləy dərzidukon heste.

Derzion dılədə bə mıştərion deştə təmizə kosənəti xıdmətbıkə qıləy merd heste, əv bo mıştərion de məhorəti, de şinə ləfzi şeeron voteydə. Şeer vote-vote bə cəmati vəy beşedə, mıştərion dəro kardeydə. Im şəxs demiyən 3-4 kəsi koy vindedə:

1. Bənə şairi bədihon, şeeron peğandeydə, xəlqi mənəviyə-milliyə ruhi oxşeydə.
2. Bənə ustodə sıxanəvoti şeeron-bədihon de ləzzəti əzbər voteydə, təhlil kardeydə, xəlqi ədəbiyə-mədəniyə səvodi bə rəvoşin kardeydə.
3. Bənə ustoə derzi olət duteydə, xəlqi tankardemoni xıdmətədə mandeydə.

TOLIŞƏ KİNƏ
Çı ruşinə honi çəşməş,
Bənə siyo kijə handəş.
Lap ceyroniş, roysə mandəş,
Məkışt mıni, tolışə kinə.

Həm ranqiniş,
Həm sanqiniş,
Həm vanqiniş,
Tolışə kinə.

Sədo bekə şo bıbəmon,
Oxo boçi co bıbamon?
İqlə kədə ho bıbəmon,
Məkışt məni, tolışə kinə.
Həm tovsoniş,
Həm zımsoniş,
Çımı coniş,
Tolışə kinə.

Ve reçiniş, aləm vində,
Çəşım bətıe, həmmə zındə.
Azən qıləy Xıdo bandə,
Məkışt mıni, tolışə kinə.

Tı həm həşiş,
Həm otəşiş,
Hərorətiş,
Tolışə kinə.

Çordə şəvə Ovşumiş tı,
Məxməriş tı, avşumiş tı,
Az aşığim əncəx bətı,
Məkışt mıni, tolışə kinə.

Həm vıləsəş,
Həm dıləsəş,
Həm xoləsəş,
Tolışə kinə.

Vəyonədə vindəm tıni,
Dəparzındən çəşon mıni.
Maştə beşi bəsə honi,
Məkışt mıni, tolışə kinə.

Ve otəşiş,
Anqə çəşiş,
Dılim bəşiş,
Tolışə kinə.

Çı tolışi kon pıştənin,
Pınhon məkə ve ıştəni.
Esət tı bəş lap kıştənin
Məkışt mıni, tolışə kinə.

Dılim bəfoş,
Sinəm səfoş,
Dardim dəvoş,
Tolışə kinə.

Mirheydərim, olət dutdəm,
Əncəx botı şeir votdəm.
Iştı roysə con opotdəm,
Məkışt mıni, tolışə kinə.

Az həyotim,
Mehibbətim,
Səxovətim,
Tolışə kinə.