Mısılmon İbemon Hərəkati fəal, dini mevzuədə mahneyon muəllif inən ifodor Kamran Kərimov (Fərat) oğətə bə.

Noyabri 16-də əçe jiə kəyku 4 kəs mulki olətinə xonəxon tərəfo de zuy bardə video pevolo kardə bə.
In video dindor fəali xeyzoni tərəfo kəşə bə.
Bənə Kamran Fərati zınə fəali əvlodon bey şər ğandeku ehtiyat kardedən.

De əçəvon votəy, mulki olətədə bə xonəxon ey bardeədə hiç qılı səbəbşon nuşu doə ni, dəşən bə kə, de zuy əvşon kəyku bekardə, das epıştə bardəşone:

“Bənə əlidə dindoron, beyən de narkotiki şər ğandeku ehtiyat kardəmon. Ey kəyku bardeədə əçe səpe hiççi bə ni. Bey de narkoti şər ğandə bıbo, bıdə həmmə bızno ki, ıştənşon noə”.

Pevolo bə videoku, Kamran Fərati əvlodonədə qılı bə mulki olətinə xonəxon hərəkəti etiroz kardə, çəvon beğanunə hərəkətonku bə Dılətonə Koon Vəzarıti “102” xıdməti şikat bəkarde bəyon kardedə.

“Bə kovrə şikat kardəş bıkə…”, – mulki olətinə xonəxonədə i kəs bey cəvob doydə, həmən bə telefon kəşe mane bedə.

Vəkil əçe bə Səbail Rayon, 8-minə Polis xonə barde, əyo dey vindemon karde nızneş votə.
Vəkil mudafiə huğuğon darışte anqıl bə Dılətonə Koon Vəzarəti inən Ombudsman Aparati ovardə.
Kamran Fərat 2021-minə sori oktyabrə manqədən de “bə polisi muğavimət” ittihomi 30 sutka dəstqir kardə bəbe.