Tosə 1991-minə sori Geygel rayoni Çaykənd diəd ermənion jiən. Hojo həmonə sori apreli 30-də OMON dəvonə hucumi bə peş əvon çığın kuçşon kardə. Holiədə bın diədə 1988-89-minə soronədə Ermənistaniku bə Azərbaycana kuç kardəyon jidən.

Çaykəndədə bə xristan əhali aid 2 tarixi məkan hıste, çımonədə qılı bə XVI əsri aid Anaid məbəd, qılıən Məqəddəsə Məryəm kilsəye. Tosə 1991-minə sori diədə jiə rməni əhali bın kilsə inən məbədədə ibadətşon kardə, dini tədbironşon dəvonə.

Har dı abidə vədə “Devlət tərəfo hifz bedə” nıvıştə bıboən, diyə nıkardeku əvon bərbod holədən. Diədə bə vaxt bə sakinon xıdmət nuşu doə, işət bo istifadə bə vəc nomə tibb məntəğən hıste. 2009-minə sori siyahıse diədə 2574 kəs əhali jiye ğeyd kardedə.