“Xural TV” dəstqirətiədə bə rəhbər Əvəz Zeynallı məhkəmədə navədən vəkil Elçin Sadıqov məhkəmə prosesədə damə karde məsələş ros kardə. Vəkil Elçin Sadıqov, dekabri 8-də bə Boku Qonə Cinayətonı məhkəmə– Əvəz Zeynallı məhkəmə proses omə.

Əmmo bın səfə Əvəz Zeynallı vəkilon bə məhkəmə Elçin Sadıqovi damə kardə nıbe qorə vəsatətşon ros kardə. Əvon, bə Əvəz Zeynallı doə ittihom epizodonədə qılı – “Baku Steel Company” MMC-i (polad ov kardə zavod) navkonə rəhbər Rasim Məmmədovi xeyzoniku 20 həzo mənot rışvə se iddio anqıl vəkil Elçin Sadıqovi həxədən co kardə cinayət ko be səbəb vardən. Yəni Elçin Sadıqovi həxədə holiədə cinayət təğib dəvom kardedə. Əv taxsiko zınə xonəxo statusədəy, şahid ğismədə damə kardə əzıni be.

“Taxsiko zınə xonəxo ıştəni mudafiə karde ro votə du qorə məsuliyyətin ni. Elçin Sadıqovi məhkəmədə damə kardə nıbo inən əçe cinayət ko materialonədə votəyon subuton siyahıku bekardə bıbo”, – vəkilon iddioşon kardə.

Əvəz Zeynallı 2022-minə sori sentyabri 10-də “Baku Steel Company” MMC-i navkonə rəhbər Rasim Məmmədovi jimoni həmro Mehriban Məmmədovaku de vəkil Elçin Sadıqovi vasitə 20 həzo mənot rışvə se ittihomi dəstqir kardə bə.

Həmon vaxt Elçin Sadıqovən de cinayətədə iştirakəti ittihomi dəstqir kardə bə. Vəkil 1 həftə bə peş – sentyabri 17-də bə kə dustoğəti vadoə bə.

2023-minə sori martədə Əvəz Zeynallı ko bə məhkəmə vığandiədə Elçin Sadıqovi həxədə ko co kardə bə.