DTX tərəfo qətə bloqere barədə 4 manq ğətimko tədbir vıjniə bə.

Əv, de tars ehaşte əmlok tələb kardeədə ittihom kardə bedə.

“Youtube” kanalonəndə hokuməti tənğıd kardə bloqer Arzu Sayadoğlu DTX tərəfo qətə bə. Əçe konco be barədə 3 ruj hiç qılı məlumat doə bə ni.

“Müdafiə Xətti” inson həxon təşkilati icrokə direktor Rufət Səfərov məsələ ictimai kardə bə peş Arzu Sayadoğlu dəstqir karde iyən Boku İstintağ Təcridxonədə be, əçe həxədə Səbail Rayon Məhkəmədə dəstqirəti ğəror doə be məlum bə.

Əv, de Cinayət Məcəllə 182.2.4 (xeyli miğdarədə əmlok bə daşt varde ro de tars ome tələb karde) maddə ittihom bedə.

Dın maddə 5 soriku tosə 10 sori ozodətiku məhrumkardə cəzo nəzərədə qətə bedə.

De Səbail rayon Məhkəmə ğərori əçe barədə bo sıftənə istintağ mıddəti 4 manq dəstqirəti qəğtimko tədbir vıjniə bə.