Avropa İnson Huğuğon Məhkəmə (AİHM) fevrali 1-də de Azərbaycani band qılıən ğərorış elan kardə.
Məhkəmə ərızədə iddio bə darıştəyon veyni. təsdığ kardə.

“Sərdar Babayev bə Azərbaycani vəynə” koədə ərızəvon hadison qınə vaxt Masalli rayonədə jiə.
Məhkəmə İronədə dini təhsil sə dini xadim Sərdar Babayevi Masalli məçitədə beğanun dini təbılğat iyən dini ayın icro karde qorə tosə məhkəmə dəstqir be iyən peşo bə cinayət məsuliyyəti cəlb be band proses bə.

Ərizəvon de Cinayət Məcəllə 168-1-minə maddə əsas, xaricədə dini təhsil sə Azərbaycan Respublika şəhrvandon tərəfo İslam dini ayinon dəvone səbəbiku bə cinayət məsuliyyət cəlb kardə bə, 3 sor mıddət ozodətiku məhrum kardə bə.

Ərizəvon AİHMi vədə, bey munasibətədə Avropa Konvensiya 3-minə (ğeyri-insoni iyən ləyağəti bə ji kardə rəftori ğədağən karde), 5-minə (ozodəti iyən nıqıne huğuğ), 6-mınə (taxsi nıbe prezumpsiya), 9-minə (fikir, vicdon iyən din ozodəti), 10-minə (ifadə ozodəti), 11-minə (qırd iyən ibe ozodəti) iyən 14 (cosəçınəti ğədəğən karde) maddon darıştə be iddioş kardə.

AİHM çe ərizəvoni Konvensiya 3-minə (metal ğəfəsədə oğəte), 5.3-minə (tosə məhkəmə beəsos dəstqirəti) iyən 9-minə maddon (bə etiğod ozodəti mudaxilə) darıştə be ğərorış doə. Bə ğərori əsas, hokumət bə ərızəvoni 6 həzo avro mənəvi zərəri əvəz təzminat doəni. Ərizəvoni huğuği təmsiləkə isə 2 həzo 500 avro huğuği xıdmət əvəzi bəste.