Bo 2 manq dəstqirətiədə bə bloqqer Rəşad Ramazanovi fevrali 5-də hukm handə be. De Boku Qonə Cinayəton Məhkəmə hukmi bloqqer de narkotik ittihomi 5 sor 4 manq ozodətiku məhrum kardə bə.

Prokuror Rəşad Ramazanovi deCinayət Məcəllə 234.4.3 (bo həvate məğsədi kulli miğdarədə narkotik bə daşt varde, kırnie, oğəte) maddə taxsiko zıne iyən bey 10 sor ozodətiku məhrumkardə cəzo doeş piə.

Bloqqeri vəkil Elçin Sadıqov əçe taxsi nıbe iyən əçe həxədə bəraət hukm bekardə beş votə.
Rəşad Ramazanovi istə oxonə kırtə sıxanədəş bəraət piə.

Peş kırtə muşavirə, hakimon əçe həxədə 5 sor 4 manq ozodətiku məhrumkardə hukmşon elan kardə.

Məhkəmədə Rəşad Ramazanov etiraz ro bataryəş ebardə. Penitensiar Xıdməti konvoyon bimi mudaxilə karde hərəkətşon kardə.

De bloqqeri jimoni həmro həmro vote, əvon hukmiku apelyasiya şikat bədon.

Rəşad Ramazanov əçe səpe peğəte iddio bə narkotiki əslində çe polison be, bəçe cif polisxonədə noə beş votə. Əv, sosial şəbəkonədə nıvıştə tənğidi fikon qorə dəstqir kardə be votedə. Bloqqer, polisxonədə bə işqəncon məruz mande, hətto de beəxloğinə hərəkəton təhdid kardə be iddio kardə. Çın səbəbiku etiraf ifadə imzo karde məcbur bə.

Rəşad Ramazanov 2013-minə sori mayədə dəstqir kardə bəbe. Bev, de narkotik ittihomi 9 sor ozodətiku məhrum kardə cəzo doə bəbe.

2019-minə sori marti 16-də de əfv sərəncomi ozod bə peş bə Qurcustan kuçış kardə, əyo jiə. Əyo jiə vaxt ıştə “Facebook” səhifədə bə Azərbaycan hökuməti, Prezidenti ədres tənğıdi fikon nıvışte dəvomış kardə. Nav dəstqir be bə Azərbaycana oqardə bən.