Avropa İttifaği Azərbaycani numayəndətiədə tosə 1 milyon mənot pul dələmurtəti band məhkəmə proses dəvom kardedə. 15 sor numayəndəti mühasib bə Zərifə Abbasova 983 həzo mənot lıq dələmurtədə ittihom bedə. Əv, dəstqirətiədə nıboən, bəçe koy ponə sori mayə manqiku Boku Qonə Cinayəton Məhkəmədə diə kardə bedə.

Marti 14-də məhkəmə prosesədə Zərifə Abbasova dəstqir be barədə ğərar ğəbul kardə bə. Hakim bekardə ğərarış, əçe bə məhkəmə nıome,, prosesiku bə kəno mandeş band kardə.

De ttihomi, puli dələmurt, Avropa İttifaği Azərbaycanədə səfiri Peter Mixalko iyən təşkilati əlidə diplomati elektron imzon, mıhi bə daşt se ro səş qətə.

Cinayət ko materialonədə Zərifə Abbasova 1 mart 2008- minə soriku tosə 18 yanvar 2023-minə sori Avropa İttifaği Azərbaycanədə numayəndəti muhasib vəzifədə ko karde, bə Avropa İttifağe Azərbaycanədə numayəndəti hesob ovoştonə pulon dələmurt karde ro səfir Peter Mixalko iyən əlidə məsul xonəxo imzo, həmçinin mıhi bə daşt varde ğeyd bə. Dın vasiton numayəndəti Beynəlxalq Bankədə hesobədə bə vəsaiton i hissəş bə daşt vardə.

Zərifə Abbasova de Cinayət Məcəllə 179.4 (xususən kulli miğdarədə dələmurt), 308.2 (bə qonə nəticon səbəb bə vəzifə səlahiyyətonku sui-istifadə) iyən 313- (vəzifə saxtakorəti) maddon ittihom kardə bedə. Dın maddon əv tosə 14 sori ozodətiku məhrumbə cəzo se bəzne.

Zərifə Abbasova ıştəni ğismən taxsiko be, 983 həzo mənot ne, təşkilati 50 həzo mənot puli dələmurt karde bəyon kardedə.