Ozobiconədə çı milli kamiyon ıştə fikiron ozod ifodə karde həx məhdud kardə bedə iyən çəvon çətinişon heste ıştə moə zıvonədə təhsil səy məsələdə. Sıvoy çımi tolışon iyən ləzgion de separatizmədə beəsosə ittihomon dimbədim bedən. Imi həxədə çı Avropə Şurə komitə ğərorədə votə bedə. Çı “Tolışon sədo” rujnomə sərredaktor Rafiq Cəlilov ğeyd kardedə ki, tolışon problemon ım məruzədə de ədoləti nişo doə bedən. Politolog Toğrul Cuvarlı elon kardəşe ki, milli kamiyon həxon məhdudiyəton Ozorboyconədə demokratə ozodətion umumi məhdudiyəton nəticəy.

Çı Avropə Şurə məslahatəvonə komitə məruzədə həmçinin ğeyd kardə bedə ki, Boku dovləti hokumət bə əvon doə məslohaton bə jimon dəvoniəşon ni. Məruzədə votə bedə: “De həyfi Ozobiconədə detobə ısət çokə ğanunədəti yaanki məslohatəvonə mexanizm mıvcud ni bo milli kamiyon həxon mıdofiə ro. Milli kamiyon nımoyəndəon ıştə həxon zınedə nin iyən ıştə həxonku isifodə kardedə nin”.

Çı komitə məruzədə sıvoy çımi milli kamiyon zıvononədə təhsili məsələonən mızokirə kardə bedən. Məruzədə votə bedə guya Boku dovlətədə jiə milli kamiyon haft gılə zıvonon haftədə 2 kərə məktəbonədə tədris kardə bedən, əmma ım gıləy ğəlpə informasiəye ki, Boku rejimi xodimon tərəfiku pevılo kardə bıə.

Çı Avropə Şurə komitə elonədə votə bedə ki, universitetə təhsilədə çı milli kamiyon zıvonon hiç gıləyni tədris kardə bedə ni. İyo bəpe ğeyd bıkəmon ki, tolışə zıvon çı dınyo həmməy univrsitetonku əncəx Yerevani Dovlətiə Universiteti İronşınosi kafedrədə tədris kardə bedə.