Mısılmonon İbemonə Hərəkəti lideron Tale Bağırzodə iyən Abbas Huseynov Ğobustani zindonədə ənəhardə aksiyə dəvoniedən. Imi barədə Ozobiconi Xəlğə Cəbhə mıxolifətə partiyə sədri mıovin Fuad Ğəhrəmanlı jen Zumrud Yağmur xəbə dodə.

De minvoli Bağırzodə iyən Huseynov ə işqəncəon əleyh etiroz kardedən, ki oxonə vaxtonədə bə əvon zindonədə dodən. Xəbə dodə bedə ki, Bağırzodə 5 iyən Huseynov 2 ruje ki, ənəhardəti dəvom kardedən. Bə Yağmuri sıxanon əsosi, ım məlumətonış əy çı Abbas Huseyni xıyzoniku gətə.

Zumrud Yağmuri həmçinin votəşe: “Həttə vaxtı ki, əy cəhdış kardə de telefoni bəştə xışəvandon xəbə bıdə zindonədə bə ıştə mınosibətədə təzyığon həxədə, icozə doəşon ni iyən telefoni dastəkışon sə”. Tale Bağırzodə deştə xışəvandon de telefoni gəp jəy həxikuən məhrume.

Çımiku bə nav Mısılmonon İbemonə Hərəkəti Ğobustani zindonədə bə ıştə həbs kardə bıə lideron mınosibətədə tojə işqəncəon iyən əzobon həxədə xəbə doəş be. İbemoni elonədə votə bedə be ki, Mısılmonon İbemonə Hərəkəti rəis Tale Bağırzodə iyən çı təşkiloti co məhbusə uzvon oxonə vaxtonədə de vində nıbə işkəncəon dim bə dim bedən iyən ım əzobon ruj bə ruj şiddətin bedən. Həmçinin xəbə doə bıə be ki, Tale Bağırzodə zindonxonə otağədə de rufə noxəşinə məhbuson ogətə bedə ki ıştə rəftori kontrol karde zınedə nin iyən bə cogılə məhbuson ziyon rosnidən.

Ozobicon Respublikə Mıslmonon İbemonə Hərəkat ıştə bəyonotədə elonış kardə be ki, əgər zindonədə bə ım hərəkati uzvon işqəncə iyən əzobon oxo doə nıbo əvon ənəhardəti aksiyə dəbəvonen.