Fevralə mangi 5-nə rujədə TolishMedia informasiya agentəti muxbiri Yerevaniku xəbə doəş be ki, bə “Hraparak” nomədə rujnomə eloni əsosi, Ermənistoni parlamentədə hakimə “Çımı gəm” siyosiə fraksiyə uzvon gıləyni de Ermənistoni iminə vəzir Nikol Paşinyani konfidensialə sohbəti təfsiloton okardəş be.

Rujnomə “Çımı gəm” fraksiyə uzviku sitot  vardedə: “Paşinyani bə Əliyevi votəşe ki, zınedə ni Ğərəboği vırədə mızokirə karde, lozime ki, Ğərəboğən mızokironədə iştirok bıkə. Bə lm votəyon Əliyevi cəvob doəşe ki, jəgobu, bəvədə çəvon tərəfiku bəpe Ğərəboği ozorboyconıjon icmo iştirok bıkə. Çımi cəvobədə Ermənistoni iminə vəziri votəşe ki, ım icmo səçınonədə bə Əliyevi sədo dodən, vəhalınki Ğərəboği ermənion əy səçın kardedə nin iyən ehanə jəgobu, bəvədə tolışon iyən ləzgion bəpe mızokironədə iştirok bıkən”

Ozobiconi KİV reaksiyə çı Paşinyani təklifi barədə rə rəsən. Məsələn, bo Boku diktatorə rejimi ko kardə day.az internetiə sayt nıvıştedə: “İ kərəən bə Paşinyani mıdrikəti labirinti dəşəmon iyən cəhd bıkəmon bə sə dəşe. İminə variant əve ki, tolışon iyən ləzgion ki de Ğərəboği mıvzu hiç əloğəşon ni, Ermənistoni iminə vəziri tərəfiku okırniə bən ki, Paşinyan guya nişo bıdo ki, Ğərəboği ozorboyconıjonən de ım mıvzu əloğəşon ni. Erməniə agitprop adətən tolışon iyən ləzgion curbəcurə mıvzuonədə daxil kardedə iyən umu bastedə jıgonə ım xəlğon arədə separatistə otəşi bıjəno”.

Əmma ım məğələ mıəllif Zulfuğar İbrahimov izoh kardedə ni ki, ehanə tolışon iyən ləzgion de Ğərəboği mıvzu hiç əloğəşon ni, bəvədə həmən tolışon iyən ləzgion boçi bəpe Ğərəboği xoto cang bıkən? Yaanki bəçi gorə həmən tolışon iyən ləzgion 90-nə soronədə Ğərəboği xoto cang kardəşone iyən şəhid bən.

Sıvoy çımi vəzyəti həxədə Ozobiconi parlamenti deputat Rasim Musabəyovi gəp jəşe. Əy votəşe: “Ehanə Paşinyani həğiğətən Ozobiconi tolışə iyən ləzgiə icmoon bə Ğərəboği mızokiron okırnie pidəşe, bəvədə əv purməzmunə mızokironku bə kəno beşe ro bo vonə nəvedə”.

Vinde bedə ki, ozorboyconıjə jurnaliston iyən deputaton dəvom bəkarden çı tolışon iyən ləzgion əloğə de Ğərəboği mıvzu inkor karde, bəvədə bıvotəmon ki de ımi əvon ıştən bə ım xəlğon signal doəşone ki, Ğərəboği cang çəvon cang ni!

Şirzad Mehdiyev